2024 جىلدىڭ توعىز ايىندا مەديسينالىق ساقتاندىرۋ قورى الماتىلىقتاردىڭ ەمدەلۋىنە تەگىن مەديسينالىق كومەك پاكەتى مەن ءمامس اياسىندا 220 ملرد تەڭگەدەن استام قاراجات جۇمسادى. بۇل جىلدىق بيۋدجەتتىڭ 66%-ىن قۇرايدى، دەپ اتاپ ءوتتى الماتى فيليالىنىڭ ديرەكتورى ءىلياس مۇحامەدجان وڭىرلىك كوممۋنيكاسيالار قىزمەتىندە وتكەن بريفينگتە، دەپ حابارلايدى aqshamnews.kz.
ونىڭ ايتۋىنشا، مەديسينالىق ۇيىمدارعا تولەمدەر ءقازىر قوردىڭ e-saqtandyru اقپاراتتىق جۇيەسى ارقىلى جۇرگىزىلۋدە.
بيىل 9 ايدا ساقتاندىرىلعان الماتىلىقتار ءمامس جۇيەسى ارقىلى جالپى قۇنى 97 ملرد تەڭگە بولاتىن مەديسينالىق كومەك تۇرلەرىن پايدالانعان.
شىعىننىڭ باسىم بولىگى، ياعني 54 ملرد تەڭگەسى ستاسيونارلىق مەديسينالىق كومەككە، 3،9 ملرد تەڭگە – كۇندىزگى ستاسيونارلار كورسەتكەن قىزمەتتەرگە تولەندى.
«مەديسينالىق كومەككە جۇگىنگەن ازاماتتار تاراپىنان ەمدەۋ مەن دياگنوستيكانىڭ باعاسى قىمبات تۇرلەرى، سالالىق مامانداردىڭ كونسۋلتاسيالارى، سونداي-اق زەرتحانا تالداۋلارىنا دەگەن سۇرانىس جوعارى بولعان. جارتى جىلدا اتالعان قىزمەتتەرگە 18،1 ملرد تەڭگە جۇمسالدى»، - دەدى فيليال باسشىسى.
فيليال باسشىسىنىڭ سوزىنە قاراعاندا، سونىڭ ىشىندە كومپيۋتەرلىك توموگرافيا مەن ماگنيتتى-رەزونانستىق توموگرافياعا (كت/مرت) دەگەن سۇرانىس بۇرىنعىشا جوعارى كۇيىندە قالىپ وتىر. جالپى الماتىدا جاسالعان 80 مىڭ كت مەن مرت ءۇشىن 1،3 ملرد تەڭگە جۇمسالدى.
«مىندەتتى الەۋمەتتىك مەديسينالىق ساقتاندىرۋ ەسەبىنەن كۇن سايىن قۇنى بىرنەشە ميلليونعا جەتىپ جىعىلاتىن جوعارى تەحنولوگيالى وپەراسيالار جاسالىپ جاتىر. بيىلعى جىلى الماتى قالاسىندا وسىنداي وتالارعا 14،7 ملرد.تەڭگە جۇمسالىپتى»،- دەيدى فيليال باسشىسى.
رەابيليتاسيا جەكە باعىتتى قامتيدى. وعان 6،3 ملرد تەڭگە بولىنگەن.