قاڭتاردىڭ 18-ىنەن 19-ىنا قاراعان ءتۇنى كرەششەنيە مەرەكەسىن اتاپ ءوتۋ كەزىندە الماتى قالاسىنداعى ادام كوپ جينالاتىن ورىندار مەن شومىلۋعا ارنالعان رەسمي رۇقسات ەتىلگەن اۋماقتاردا مەديسينا قىزمەتكەرلەرى كۇشەيتىلگەن رەجيمدە جۇمىس ىستەيدى. بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا الماتى قالاسىنىڭ جەدەل مەديسينالىق جاردەم قىزمەتى ديرەكتورىنىڭ ورىنباسارى پاۆەل بۋردا مالىمدەدى، دەپ حابارلايدى aqshamnews.kz
ونىڭ ايتۋىنشا، شومىلۋعا ارنالعان بارلىق رەسمي ورىنداردا جەدەل مەديسينالىق جاردەم بريگادالارى تاۋلىك بويى كەزەكشىلىك ەتەدى. مەديسينالىق توپتار بىلىكتى ماماندارمەن تولىقتىرىلعان، ولار سۋىقتان توڭىپ قالعان، ءوزىن جايسىز سەزىنگەن نەمەسە جەدەل كومەككە مۇقتاج ازاماتتارعا دەر كەزىندە كومەك كورسەتۋگە تولىق دايىن.
بريگادالاردى ورنالاستىرۋ، جەتۋ باعىتتارى مەن ءوزارا بايلانىس ءتارتىبى توتەنشە جاعدايلار دەپارتامەنتى بولىمشەلەرىمەن جانە جەرگىلىكتى اتقارۋشى ورگاندارمەن بىرلەسىپ الدىن الا پىسىقتالعان. قاجەت بولعان جاعدايدا كەزەكشى بريگادالار كۇشەيتىلىپ، جاعدايعا قاراي ادام كۇشى مەن تەحنيكانى قايتا ءبولۋ دە قاراستىرىلعان.
«جەدەل مەديسينالىق جاردەم قىزمەتى قالا تۇرعىندارى مەن قوناقتارىن ءدىني راسىمگە جاۋاپكەرشىلىكپەن قاراپ، قاۋىپسىزدىك تالاپتارىن ساقتاۋعا جانە دارىگەرلەردىڭ كەڭەسىنە قۇلاق اسۋعا شاقىرادى. سۋىق سۋعا تۇسەر الدىندا دەنساۋلىق جاعدايىن ەسكەرگەن ءجون. جۇرەك-قانتامىر، تىنىس الۋ جانە ەندوكريندىك جۇيە اۋرۋلارى بار، سۋىق تيگەن نەمەسە سوزىلمالى دەرتى اسقىنعان ادامدارعا شومىلۋدان باس تارتۋ ۇسىنىلادى. سونداي-اق ماس كۇيدە سۋعا تۇسۋگە قاتاڭ تىيىم سالىنادى»، – دەدى پاۆەل بۋردا.
مەديسينا قىزمەتكەرلەرى سۋىق سۋدا ۇزاق ۋاقىت بولماۋ كەرەكتىگىن ەسكەرتەدى. سۋدان شىققاننان كەيىن بىردەن جىلىنىپ، قۇرعاق ءارى جىلى كيىم مەن اياق كيىم كيىپ، قايتادان سۋىققا شىعۋعا بولمايدى.
«ەگەر ادام ءوزىن جايسىز سەزىنىپ، باسى اينالىپ، ەنتىگىپ، قاتتى قالتىراپ نەمەسە وزگە دە قولايسىز جاعداي تۋىنداسا، دەرەۋ كەزەكشى جەدەل جاردەم بريگاداسىنا نەمەسە توتەنشە جاعدايلار دەپارتامەنتىنىڭ قىزمەتكەرلەرىنە جۇگىنۋ قاجەت»، – دەپ اتاپ ءوتتى ول.
الماتى قالاسىنىڭ جەدەل مەديسينالىق جاردەم قىزمەتى مەرەكەلىك ءىس-شارالار كەزەڭىندە جوعارى دايىندىق رەجيمىندە جۇمىس ىستەپ، بارلىق شۇعىل شاقىرتۋلارعا ۇزدىكسىز ءارى جەدەل ارەكەت ەتۋگە تولىق دايىن.