الماتى اكىمى دارحان ساتىبالدى جۇمىس ساپارى بارىسىندا الاتاۋ اۋدانىنداعى ءبىرقاتار نىساندى ارالاپ، «باتىس» پوليورتالىعىن دامىتۋ جايىن تالقىلادى.
قالانىڭ 2040 جىلعا دەيىنگى باس جوسپارىندا مونوورتالىقتى دامۋدان كوپورتالىقتى ۇلگىگە كوشۋ كوزدەلگەن. قالاداعى ىسكەرلىك بەلسەندىلىكتى قايتا بولۋگە، ورتالىق اۋداندارداعى جۇكتەمەنى ازايتۋعا جانە جاڭا ءوسۋ نۇكتەلەرىن قالىپتاستىرۋعا باعىتتالعان پوليورتالىقتاردىڭ ءبىرى الاتاۋ اۋدانىندا ورنالاسادى.
200 گەكتار اۋماقتاعى «باتىس» پوليورتالىعى اياسىندا 9 جاڭا بالاباقشا، 6 مەكتەپ، سپورت كەشەندەرى، 70 گەكتارلىق رەكرەاسيالىق ايماق پەن ساياباق، 920 مىڭ شارشى مەتر كوممەرسيالىق الاڭ جانە زاماناۋي تۇرعىن ءۇي قۇرىلىسى جوسپارلانعان.
«جوبانى ءبىرىڭعاي ساۋلەتتىك تۇجىرىمداماعا سايكەس جەتىلدىرۋ قاجەت. جوبالاۋشىلاردىڭ ءوز مۇددەسى بار، ولار كوبىرەك تۇرعىن ءۇي سالعىسى كەلەدى. ءبىزدىڭ مىندەتىمىز – تەپە-تەڭدىكتى ساقتاي وتىرىپ، تۇرعىن ءۇيدىڭ تىعىزدىعىن ازايتۋ، پوليورتالىق يادرولارىنىڭ جۇرگىنشىلەر بايلانىسىن قامتاماسىز ەتۋ. مۇندا قوناقۇيلەر، ىسكەرلىك ورتالىقتار، الەۋمەتتىك نىساندار بولۋى ءتيىس. سوندا اۋدان تارتىمدى بولادى»، – دەپ اتاپ ءوتتى الماتى اكىمى دارحان ساتىبالدى.
سونىمەن قاتار قالا باسشىسى زەردەلى شاعىناۋدانىندا 550 ورىنعا ارنالعان مەكتەپ قۇرىلىسىمەن تانىستى. جوباعا سايكەس اسحاناسى، سپورت زالى، وقۋ سىنىپتارى، زەرتحانالىق جانە مۋلتيمەديالىق كابينەتتەرى بار 3 قاباتتى عيمارات قاراستىرىلعان.
مەكتەپ قۇرىلىسى 2024 جىلدىڭ شىلدەسىندە باستالعان. الايدا مەردىگەر كومپانيا كەلىسىمشارتتى ورىنداماعاندىقتان، سوت شەشىمىمەن ادال ەمەس دەپ تانىلدى. وسىدان كەيىن قۇرىلىس باسقارماسى جاڭا مەردىگەردى انىقتاپ، بۇگىندە نىساندا جۇمىستار قارقىندى ءجۇرىپ جاتىر. سىرتقى جانە ىشكى قابىرعالار تۇرعىزىلىپ، شاتىر ورناتىلۋدا، ىشكى ارلەۋ جۇمىستارى باستالعان. قوسىمشا ينجەنەرلىك جەلى تارتىلۋدا.
دارحان ساتىبالدى جۇمىستى جەدەلدەتىپ، مەكتەپ قۇرىلىسىن جىل سوڭىنا دەيىن اياقتاۋدى تاپسىردى. اكىم ماتەريالداردىڭ ساپاسىنا جانە ءبىلىم ورداسىن زاماناۋي جابدىقتاۋعا ەرەكشە نازار اۋدارۋدى مىندەتتەدى.