الماتى قالاسىنىڭ قوعامدىق دەنساۋلىق ساقتاۋ باسقارماسى سەرىكجان سابىرالييەۆتىڭ ەڭبەك شارتىنىڭ مەرزىمى اياقتالۋىنا بايلانىستى 2025 جىلدىڭ 13 قازانىنان باستاپ ورتالىق قالالىق كلينيكالىق اۋرۋحانا (وقكا) ديرەكتورى قىزمەتىنەن بوساتىلعانىن حابارلادى، دەپ حابارلايدى Aqshamnews.kz ءتىلشىسى.
بايگە جاريالانعانعا دەيىن اۋرۋحاناعا ۋاقىتشا باسشى بولىپ المات چورمانوۆ تاعايىندالدى. ول بۇعان دەيىن قاراساي كوپسالالى ورتالىق اۋداندىق اۋرۋحاناسىندا جۇمىس ىستەگەن.
انىقتاما بويىنشا، المات تۇرسىنجانوۆيچ چورمانوۆ — حيرۋرگ، مەديسينا عىلىمدارىنىڭ كانديداتى، قاۋىمداستىرىلعان پروفەسسور، قوعامدىق دەنساۋلىق ساقتاۋ ماگيسترى؛ 24 جىلدىق ەڭبەك ءوتىلىنىڭ 18 جىلىن كلينيكالىق جانە باسقارۋشىلىق قىزمەتكە ارناعان. سىزعانوۆ اتىنداعى ۇلتتىق عىلىمي حيرۋرگيا ورتالىعىندا باۋىر حيرۋرگياسى ءبولىمىنىڭ دارىگەرى، الماتىداعى №7 قالالىق كلينيكالىق اۋرۋحانادا حيرۋرگيا جونىندەگى باس دارىگەردىڭ ورىنباسارى، كەيىن سىزعانوۆ ورتالىعىندا باس دارىگەر جانە باسقارما ءتوراعاسىنىڭ عىلىمي‑كلينيكالىق جانە يننوۆاسيالىق قىزمەت بويىنشا ورىنباسارى قىزمەتتەرىن اتقارعان.
ەسكە سالايىق، سەرىكجان سابىرالييەۆ 2023 جىلى وقكا ديرەكتورى بولىپ ناريمان تابىنبايەۆتىڭ ورنىنا كەلگەن. ول كەزدە اۋرۋحانادا ءبىرقاتار پاسيەنتتەن ۆيچ انىقتالۋىنا بايلانىستى ۇلكەن داۋ تۋعان. كوميسسيا 593 بايلانىستا بولعان ادامدى جانە دونورلاردى تەكسەرىپ، ولاردىڭ اراسىنان جاڭا جۇقپا انىقتالمادى. ەپيدەميولوگيالىق تەرگەۋ ينفەكسيا ءينۆازيۆتى پروسەدۋرالار كەزىندە مەديسينا قىزمەتكەرلەرىنىڭ كىناسىنەن جۇققانىن كورسەتتى.