قالا تۇرعىندارى مەن قوناققا كەلۋشىلەر كوپ باراتىن بۇل ورىن 1937 جىلعى 7 قاراشادان باستاپ جۇمىس ىستەپ كەلەدى.
الماتىداعى حايۋاناتتار باعى ءوزىنىڭ 84 جىلدىعىن اتاپ وتۋدە، دەپ حابارلايدى Almaty-akshamy.kz
«وسى جىلدار ىشىندە كوپتەگەن قۋانىشتى وقيعالار بولدى. ەكسپەديسيالار، كەڭەس وداعىنىڭ قالالارىنا، دۋروۆ سيركىنە ساياحاتتار جاسالدى، 70-جىلدارى بىزدە بەس ءپىل تۋدى، 80-جىلدارى – ءبىر جۇپ بەگەموتتان ون بەگەموتقا كوبەيدى، 2006 جىلدان باستاپ 15 كەرىكتىڭ ءتولى ومىرگە كەلدى. وتكەن عاسىردىڭ 90-جىلدارىنداعى قيىن كەزەڭدەردى حايۋاناتتار باعى دا باستان كەشىردى، ءبىراق ساقتالىپ قالدى»، - دەپ ەسكە الادى حايۋاناتتار باعىنىڭ قىزمەتكەرلەرى تاريحتىڭ كەيبىر ساتتەرىن.
ءتۇرلى جاعدايلارعا قاراماستان، الماتى حايۋاناتتار باعى بۇرىنعىداي ەلىمىزدىڭ باستى حايۋاناتتار باعى سانالىپ، جاقسى جاققا وزگەرىپ، زامان تالابىنا ساي دامىپ كەلەدى.
توعانداردى قالپىنا كەلتىرۋ جۇمىستارى باستالىپ، ايۋلار مەن قاسقىرلارعا ارنالعان جاڭا قورشاۋلار سالىندى. بۇل جەتىستىكتەرگە الماتى حايۋاناتتار باعى قىزمەتكەرلەرىنىڭ تالاي بۋىنىنىڭ ەڭبەگى، كۇش-جىگەرى جۇمسالدى.
«الدا كوپتەگەن جوسپارلار مەن يدەيالار بار، ءبىز ولاردى مىندەتتى تۇردە جۇزەگە اسىرامىز. تۋعان كۇنىمىزبەن قۇتتىقتاعان لەبىزدەرىڭىزدى قابىلدايمىز»، - دەلىنگەن حايۋاناتتار باعىنىڭ Instagram پاراقشاسىندا جاريالانعان حابارلامادا.