الماتىداعى حايۋاناتتار باعى قالپىنا كەلتىرىلمەك

2023 جىلى 70% توزعان مادەنيەت نىساندارىنىڭ ينفراقۇرىلىمىنا ەرەكشە كوڭىل بولىنەدى

الماتى اكىمى ەربولات دوسايەۆ ءماسليحات وتىرىسىندا قالاداعى حايۋاناتتار باعىن قايتا جاڭعىرتۋ جوسپارى تۋرالى ايتتى، دەپ حابارلايدى Almaty-akshamy.kz Zakon.kz-كە سىلتەمە جاساپ.

اكىمنىڭ ايتۋىنشا، 2023 جىلى 70% توزعان مادەنيەت نىساندارىنىڭ ينفراقۇرىلىمىنا ەرەكشە كوڭىل بولىنەدى.

"الماتى حايۋاناتتار باعىن قالا تۇرعىندارى مەن تۋريستەردى تارتاتىن ورتالىققا اينالدىرۋ ءۇشىن ونى حالىقارالىق ستاندارتتارعا ساي كەزەڭ-كەزەڭىمەن قايتا قۇرۋدى باستاۋ جوسپارلانىپ وتىر"، - دەدى ەربولات دوسايەۆ.

وعان قوسا، اكىم جالپى سوماسى 2 ملرد تەڭگەگە "الاتاۋ" ءداستۇرلى ونەر تەاترىن كۇردەلى جوندەۋ، قۋىرشاق تەاترىن، قالالىق مۇراعاتتى جاڭعىرتۋ جانە كىتاپحانالاردى سيفرلاندىرۋ باستالاتىنىن قوسا كەتتى.

سونىمەن قاتار 2022 جىلى قازاق مەملەكەتتىك سيركىنىڭ عيماراتىن جاڭعىرتۋعا، قازاق زاعيپتار قوعامى مەن "قازاق قوعامىن" مادەنيەت ءۇيىنىڭ جاڭا عيماراتىن سالۋعا جوبالىق-سمەتالىق قۇجاتتاما (جسق) دايىندالدى.

"بۇل ماقساتتارعا قوسىمشا قاراجات بولىنەدى"، - دەدى ەربولات دوسايەۆ.

الماتى حايۋاناتتار باعى – قازاقستانداعى ەڭ كونە زوولوگيا ساياباقتاردىڭ ءبىرى. 1935 جىلى 25 قاڭتاردا قۇرىلعان، ءبىراق 1937 جىل رەسمي اشىلۋ جىلى بولىپ سانالادى.

5 جەلتوقساندا قىس تۇسۋىنە بايلانىستى حايۋاناتتار باعىنا قالا قوناقتارى – ۇيرەكتەر، قاراقۇيرىقتار مەن كوگەرشىندەر كەلگەنى حابارلاندى. ولاردىڭ "تەگىن ازىقتانۋىنا" بايلانىستى زووباق اكىمشىلىگى قۇستاردىڭ قورەگىن ەكى-ۇش ەسەگە ارتتىردى.