مۇندا ەڭ سوڭعى رەت 1978 جىلى ءمايىت جەرلەنگەن.
مەدەۋ اۋدانىنىڭ تۇرعىندارى شاعىمدانىپ وتىر، دەپ حابارلايدى Almaty-akshamy.kz
ولاردىڭ ايتۋىنشا، قورىم بىرنەشە جىلدان بەرى قاراۋسىز قالعان. اۋماق قورشالماعاندىقتان، توڭىرەكتى قاداعالاۋ قيىنعا سوعادى ەكەن. ودان قالسا، كونە زيرات بىرنەشە جەكە سەكتورلى ۇيگە ىرگەلەس ورنالاسقان. سونىڭ كەسىرىنەن كەيبىر بەيىت تۇرعىن ءۇي اۋلالارىندا جاتىر.
اينالاسى قورشالماعان اۋماق كوشە كەزگەندەردىڭ تۇراقتى مەكەنىنە اينالعان. جەرگىلىكتى تۇرعىنداردىڭ ايتۋىنشا، ولار وسىندا توپتاسىپ وتىرادى، كەيىن اينالاسىن قوقىسقا تولتىرادى. قاجەت بولسا، زيراتتاردىڭ جانىنا قونىپ تا قالاتىن كورىنەدى.
"مازار قوقىس ۇيىندىسىنە اينالعانداي. قاراپ-قاداعالاپ، كۇتىم جاساپ جاتقان ەشكىم جوق. ودان بولەك، بۇل جەرگە ەشكىم زەرتتەۋ جۇرگىزبەگەن. ەلگە تانىمال، كورنەكتى تۇلعالاردىڭ وسىندا بولماسىنا كىم كەپىل؟ قولىمىزداعى تاريحتى ءوزىمىز ءوشىرىپ وتىرمىز. ءتۇرلى ۆانداليزم بولعانىن انىق كورۋگە بولادى. تەمىرلەردى قيراتقان. بەلگىلەردى جۇلىپ الىپ كەتكەن"،– دەيدى قوعام بەلسەندىسى ەۆگەنيي موروزوۆا.
ءاتى-جونى بەلگىسىز بەيىتتىڭ تۇرعىزىلعانىنا جارتى عاسىرعا جۋىقتاپتى. ءۇي يەسىنىڭ ايتۋىنشا، ونى ەشكىم ىزدەپ كەلمەيتىن دە كورىنەدى. جەرگىلىكتى جۇرت ءتۇن ىشىندە ۇيگە كىرىپ-شىعۋىمىزدىڭ ءوزى قورقىنىشتى دەپ وتىر.
"بۇل مازاردا جەرلەنگەندەردىڭ باسىم كوپشىلىگى – سوعىس ارداگەرلەرى. ماسەلەن، مەنىڭ ەكى اتام دا وسىندا جاتىر. قولىمنان كەلگەنشە ارا-تۇرا بارىپ اينالاسىن تازارتىپ، كۇتىم جاساۋعا تىرىسامىن. ءبىراق وزدەرىڭىز كورگەندەي، اۋماق وتە ۇلكەن. كوپشىلىگى 1800 جىلداردىڭ تۋمالارى. ارتتارىنان ەشكىم ىزدەپ كەلمەيدى دە"، – دەيدى قالا تۇرعىنى ريما گورىنينا.
مەدەۋ اۋداندىق اكىمدىگىنىڭ ايتۋىنشا، زيرات وتە كونە. مۇندا ەڭ سوڭعى رەت 1978 جىلى ءمايىت جەرلەنگەن. ءقازىر اۋماقتى قورشاۋ جۇمىستارى قاراستىرىلىپ جاتىر ەكەن.
اۋماعى 3 گەكتار بولاتىن ات شاپتىرىم جەر الداعى ۋاقىتتا كوپشىلىككە دەمالىس ايماعى رەتىندە پايدالانۋعا بەرىلۋى دە مۇمكىن. ورتاق تالاپ بويىنشا – بىرنەشە جىل تۇرعان قورىمدار ۇستىنە ساياباق نەمەسە باسقا دا قوعامدىق عيمارات سالىناتىنى بەلگىلى. دەسە دە، جەرگىلىكتى اكىمدىك ءاربىر جۇمىس تۇرعىندارمەن كەڭەسە وتىرىپ جۇرگىزىلەتىنىن ايتتى.