الماتىداعى ەمحانانىڭ ءبولىم مەڭگەرۋشىسى: «كوروناۆيرۋسقا قارسى زاماناۋي ۆاكسينالار ءقاۋىپسىز»
الماتىدا كوروناۆيرۋسقا قارسى 200-دەن استام ەكپە پۋنكتى بار، ولاردىڭ ءبىر بولىگى قالانىڭ ساۋدا-ويىن-ساۋىق ورتالىقتارىندا ورنالاسقان. ءموبيلدى پۋنكتتەردە 1 200-دەن استام مەديسينا قىزمەتكەرى جۇمىس ىستەيدى، دەپ حابارلادى Almaty-akshamy.kz. ولاردىڭ اراسىندا الماتى قالاسىنداعى №5 ەمحانانىڭ پەدياتريا ءبولىمىنىڭ مەڭگەرۋشىسى گۇلزات بايزاقوۆا دا بار. ساۋىردەن باستاپ دارىگەر «مەگا پارك» سوسو ەكپە پۋنكتىندە جۇمىس جاساۋدا. ەكپە پۋنكتى الماتى تۇرعىندارىن ۆاكسينالاۋ بويىنشا كوشباسشىلار قاتارىندا.
گۇلزات بايزاقوۆا «مەگا پارك» سوسو-دا ەكپە پۋنكتى جۇمىستى 10 ساۋىردەن باستاعانىن ايتتى. ۆاكسينا الۋعا تىلەك ءبىلدىرۋشى بارلىق جاندار Egov mobile قوسىمشاسى ارقىلى الدىن الا جازىلا الادى. ەكپە سالدىرۋعا كەلگەندەردىڭ ءارقايسىسى ءتورت كەزەڭنەن وتەدى.
«الدىمەن ءبىز ناۋقاستى بازا بويىنشا تەكسەرەمىز، ونىڭ قانداي دا ءبىر قارسى كورسەتىلىمدەرى بار-جوعىن ءبىلۋ ءۇشىن ساۋالناما تولتىرادى. سودان كەيىن دارىگەردىڭ كەڭسەسىندە دەنە قىسىمى مەن تەمپەراتۋراسىن ولشەيتىن، پۋلسوكسيمەتر كومەگىمەن ساتۋراسيانى تەكسەرەمىز. وسى ۋاقىتتا ەكپە پۋنكتىندە ۆاكسينا دايىندالادى. بارلىق باقىلاۋ از ۋاقىتتى الادى. وسى راسىمنەن كەيىن ءاربىر ادام ارنايى بەيدج الادى دا، 30 مينۋت بويى دەمالاتىن بولمەدە بولادى»، - دەدى ءبولىم مەڭگەرۋشىسى.
گۇلزات بايزاقوۆانىڭ ايتۋىنشا، بارلىق قالا تۇرعىندارى ۇسىنىلعان ءتورت ۆاكسينانىڭ كەز كەلگەنىن تاڭداۋعا قۇقىلى. بۇل «سپۋتنيك V»، «QazVac»، «Hayat-Vax» پەن «CoronaVac».
«ءبىز 150-دەن 250 ادامعا دەيىن ۆاكسينالايمىز. ەكپە پۋنكتى كۇن سايىن، دەمالىسسىز ساعات 10.00-دەن 20.00-گە دەيىن جۇمىس ىستەيدى. ءبىزدىڭ پۋنكتتە ۆاكسينانىڭ ءبىرىنشى كومپونەنتىن شامامەن 8 600 ادام، ەكىنشى كومپونەنتىن 6 400-دەن استام قالا تۇرعىنى الدى»، - دەپ حابارلادى دارىگەر.
18 جاسقا تولماعان ادامداردى، جۇكتى مەن بالا ەمىزەتىن ايەلدەردى، سونداي-اق دەنساۋلىق جاعدايىنا بايلانىستى قارسى كورسەتىلىمدەردى قوسپاعاندا، بارلىق تىلەك بىلدىرۋشىلەر ۆاكسينا الۋعا مىندەتتى. ال ونكولوگيالىق ناۋقاستارعا مەديسينالىق كومەك كورسەتىلەدى.
ءسوز سوڭىندا گ. بايزاقوۆا كوروناۆيرۋسقا قارسى قازىرگى زامانعى ۆاكسينالار ءقاۋىپسىز ءارى ولاردىڭ قارسى كورسەتىلىمدەرى جوق ەكەنىن ايتتى. سوندىقتان قالا تۇرعىندارى جاناما اسەرلەر تۋرالى الاڭداماۋى كەرەك.
01.02.2021-20.06.2021 ارالىعىنداعى بارلىق كەزەڭدە الماتىدا 375 340 ادام ۆاكسينالاندى.
وتكەن تاۋلىكتە 2 426 ادام ەكپە الدى. 60 جاستان جوعارى ەكپە العاندار سانى 45 304 ادامدى قۇرايدى.
قالادا مەديسينالىق ۇيىمداردا، مەكتەپتەردە، مادەنيەت، سپورت نىساندارىندا، بازار مەن قالانىڭ سوسو-دا 211 ۆاكسينا پۋنكتتەرى جۇمىس ىستەيدى (250-گە دەيىن ۇلعايتۋ مۇمكىندىگىمەن). 1 257 ادامنان قۇرىلعان 304 ەكپە بريگادالارى جۇمىلدىرىلعان.