الماتىدا قالالىق ەكولوگيا باسقارماسىمەن بىرلەسىپ تابيعاتتى قورعاۋ پروكۋراتۋراسى ازىرلەگەن اتموسفەرالىق اۋانى قورعاۋ جونىندەگى ءىس-شارالار جوسپارى اياسىنداعى جۇمىس جالعاسۋدا، دەپ حابارلايدى aqshamnews.kz
ساراپشىلاردىڭ مالىمەتىنشە، مەگاپوليستەگى اۋا لاستانۋىنىڭ شامامەن 60%-ى اۆتوكولىكتەردەن كەلەدى. سوندىقتان جولداردا دا، اۆتوبازالاردا دا شىعارىندىلاردى باقىلاۋ كۇشەيتىلگەن. بيىلعى جوسپارعا كوممۋنالدىق، جولاۋشىلار جانە جۇك كولىكتەرىن تەكسەرۋگە ارنالعان جەكە باعىت ەنگىزىلدى. جىلجىمالى ەكولوگيالىق زەرتحانالار كولىكتەر پايدالانىلاتىن ورىندارعا شىعىپ، ولاردىڭ تەحنيكالىق جاعدايىن جانە شىعارىندىلار دەڭگەيىن تىركەپ، ىقتيمال ارتىق شىعارىندىلاردى انىقتايدى.
كەزەكتى ەكولوگيالىق رەيد تۇركسىب اۋدانىندا ءوتتى. وندا ەكولوگيا باسقارماسىنىڭ ماماندارى، پوليسەيلەر جانە ەكواكتيۆيستەر جەڭىل كولىكتەر مەن اۆتوبۋستاردى تەكسەردى. ۆوديتەلەر انىقتالعان زاڭبۇزۋشىلىقتاردى جويۋ جونىندە ۇسىنىستار الدى، ال «رەنەسسانس پليۋس» جشس-نىڭ جىلجىمالى زەرتحاناسى كولىكتەردىڭ تەحنيكالىق جاعدايىن جانە شىعارىندىلارىن تىركەدى.
«سوڭعى جىلدارى قالانىڭ ەكوپوستتار جۇمىسى كۇشەيگەننەن كەيىن، نورمادان اسىپ تۇرعان كولىكتەردىڭ ۇلەسى ازايدى. الايدا ازوت توتىعۋى جانە باسقا دا لاستاعىشتاردىڭ جالپى دەڭگەيى ءالى جوعارى. ەلەكتروموبيلدەر سانى ءوسىپ كەلەدى، ءبىراق ولاردىڭ ۇلەسى از بولعاندىقتان، قالانىڭ ەكولوگياسىنا ايتارلىقتاي اسەر ەتە الماي وتىر»، – دەدى «رەنەسسانس پليۋس» كومپانياسىنىڭ اعا ەكولوگى يسلامبەك نۇرماعامبەتوۆ.
رەيدكە قاتىسقان ەكولوگ-عالىم ەۆگەنيي مۋحامەدجانوۆ قولدانىستاعى نورمالار بارلىق لاستاۋشى زات تۇرلەرىن قامتىمايتىنىن اتاپ ءوتتى: «ءبىز ءار جولى جۇرگىزۋشىلەردى جاۋاپكەرشىلىككە تارتۋعا بولاتىن كورسەتكىشتەردى تىركەيمىز – ال ولاردىڭ باسىم بولىگى نورما شەگىندە. ءبىراق اۋا ساپاسىنا قاتتى اسەر ەتەتىن باسقا زاتتار دا بار، ال بىزدە ولاردى باقىلاۋ قۇرالى جوق. تالاپتار مەن ستاندارتتاردى جاڭارتۋ قاجەت. ەگەر بۇگىن قولعا الساق، بىرنەشە جىلدا قالىپتى اۋامەن دەمالاتىن بولامىز»، – دەدى ول.
اۆتوبۋس پاركتەرىنىڭ وكىلدەرى دە ءوز مالىمدەمەسىندە جەلىگە تەك جاڭا، تابيعي گازبەن جۇرەتىن اۆتوبۋستار شىعارىلاتىنىن، ولاردىڭ تەحنيكالىق جاعدايىنا باقىلاۋ كۇشەيتىلگەنىن ايتتى. قالالىق اۆتوپاركتەردىڭ ماقساتى – قوعامدىق كولىكتىڭ تۇراقتى جۇمىسىن قامتاماسىز ەتۋ جانە اتموسفەراعا تۇسەتىن زياندى ازايتۋ.
Eco Almaty جشس-نىڭ اتموسفەرالىق اۋا دەپارتامەنتىنىڭ باسشىسى ايدانا قاسەننىڭ ايتۋىنشا، رەيدتىك تەكسەرىستەر قالا بويىنشا جۇرگىزىلىپ جاتىر. سوڭعى رەيدتەردىڭ بىرىندە 20 اۆتوكولىك تەكسەرىلىپ، ەكەۋىنەن نورمادان اسقان كورسەتكىشتەر انىقتالعان.
ساراپشىلاردىڭ ايتۋىنشا، قازاقستاندا كەيبىر تەحنيكا ساناتتارى ءۇشىن شىعارىندىلاردىڭ ناقتى ستاندارتتارى ءالى بەكىتىلمەگەن، سوندىقتان قازىرگى ولشەنگەن كورسەتكىشتەر كەيىنگى ستاندارتتاۋعا نەگىز بولادى.
بيىل الماتىداعى 19 ستاسيونارلىق جانە 2 جىلجىمالى ەكوپوستتا 186 385 ولشەۋ جاسالىپ، اقبتك-نىڭ 334-بابى بويىنشا شامامەن 20 مىڭ اكىمشىلىك حاتتاما تولتىرىلعان. ەسكەرتۋلەر مەن ايىپپۇلداردى قوسا العاندا، جالپى سوماسى 653 ملن تەڭگەدەن استى. بۇل شارالار باقىلاۋ جۇيەسىنىڭ جۇمىس ىستەپ تۇرعانىن كورسەتەدى، الايدا اۋا لاستانۋىن ازايتۋ ءۇشىن ستاندارتتار مەن نورماتيۆتەردى جەتىلدىرۋ نەگىزگى قادام بولىپ قالىپ وتىر.
اتقارىلۋى ءتيىس پروبلەمالىق ماسەلەلەر بويىنشا الماتى قالاسىنىڭ اكىمدىگى قولدانىستاعى تابيعات قورعاۋ زاڭناماسىن وزەكتەندىرۋ ءۇشىن ورتالىق مەملەكەتتىك ورگاندارعا ءبىرقاتار ۇسىنىستار دايىنداپ جاتىر.