الماتىداعى “باراحولكادا” ۆەيپ ساتاتىن ورىن جويىلدى.
ونى 42 جاستاعى جەكە كاسىپكەر ۇيىمداستىرعان. ول زاڭ تالابىن ەلەمەي، بۇل كاسىپتى جاسىرىن جۇرگىزۋگە شەشىم قابىلداعان، دەپ حابارلايدى aqshamnews.kz Polisia.kz-كە سىلتەمە جاساپ.
– جۇرگىزىلگەن جەدەل ءىس-شارالار بارىسىندا دۇڭگىرشەكتە ەلەكتروندى تەمەكىنىڭ زاڭسىز اينالىمى دەرەگى انىقتالدى. 3 مىڭ ۆەيپ تابىلدى جانە تاركىلەندى. اتالعان دەرەك بويىنشا جەتىسۋ اۋداندىق پوليسيا باسقارماسى سوتقا دەيىنگى تەرگەۋ امالدارىن باستادى. زاتتاي ايعاقتار قىلمىستىق ءىس ماتەريالدارىنا قوسىلدى، – دەدى الماتى قالالىق پد ەكسترەميزمگە قارسى كۇرەس باسقارماسىنىڭ باستىعى اسحات داۋلەتياروۆ.
ەستەرىڭىزگە سالا كەتەيىك، 2024 جىلدىڭ 20 ماۋسىمىندا قازاقستاندا ۆەيپتەردى ساتۋعا تىيىم سالاتىن زاڭ نورمالارى كۇشىنە ەندى. قازاقستان رەسپۋبليكاسىنىڭ قىلمىستىق كودەكسىنە 301-1-باب (شەگىلمەيتىن تەمەكى بۇيىمدارىنىڭ، ەلەكتروندىق تۇتىنۋ جۇيەلەرىنىڭ (ۆەيپتەردىڭ)، ولارعا ارنالعان حوش يىستەندىرگىشتەر مەن سۇيىقتىقتاردىڭ اينالىمى) قوسىلدى.