كاسىپورىن ديرەكتورىنىڭ ايتۋىنشى، وقىس وقيعاعا سەحتاعى تەحنيكالىق اقاۋ سەبەپ بولعان كورىنەدى
الماتىداعى بالمۇزداق شىعاراتىن زاۋىتتا وتكىر ءيىستى اممياك توگىلىپ، سالدارىنان 5 ادام ۋلاندى، دەپ حابارلايدى Almaty-akshamy.kz Almaty.tv-گە سىلتەمە جاساپ.
كاسىپورىن ديرەكتورىنىڭ ايتۋىنشى، وقىس وقيعاعا سەحتاعى تەحنيكالىق اقاۋ سەبەپ بولعان كورىنەدى. ال زارداپ شەككەن قىزمەتكەرلەر ءقازىر اۋرۋحانادا جاتىر.
ۋلانىپ اۋرۋحاناعا تۇسكەن 5 قىزمەتكەردىڭ ءقازىر تورتەۋىنە ستاسيونارلىق ەم تاعايىندالعان. دارىگەرلەردىڭ ايتۋىنشا، ناۋقاستىڭ ۇشەۋى ءقازىر ەسىن جيعانمەن، جانساقتاۋ بولىمىندە جاتىر. ولاردىڭ جاعدايى اۋىر بولعاندىقتان، مەديسينا قىزمەتكەرلەرىنىڭ ءجىتى باقىلاۋىندا.
«قالعان ءبىر ناۋقاس توكسيكولوگيا بولىمىندە ەم الىپ جاتىر. جاعدايى ورتاشا-تۇراقتى. ءبىرىنشى تۇسكەن كەزدە بارلىعىنىڭ ەسى انىق بولدى دەپ ايتپايمىن. ءبىراق قاي جەردە بولعانىن، قالاي كەلگەنىن ولار دا ايتىپ بەردى. بۇگىندە ەمدەۋشى دارىگەرلەر ناۋقاستارمەن جۇمىس جۇرگىزىپ جاتىر. بىرتىندەپ وز-وزدەرىنە كەلگەن سوڭ ايتا باستايدى»، – دەدى قالالىق جەدەل شۇعىل كومەك كورسەتۋ اۋرۋحاناسى قابىلداۋ بولىمشەسىنىڭ ءبولىم مەڭگەرۋشىسى باۋىرجان وماروۆ.
اۋرۋحاناعا جەتكەندە ناۋقاستار ەسىن بىلمەپتى. دارىگەرلەر اممياك اۋاعا تاراعان ساتتە كاسىپورىن قىزمەتكەرلەرى سەح ىشىندە قامالىپ قالسا، ءتىل تارتپاي كەتەر ەدى دەيدى. ال وقىس وقيعاعا ناقتى سەبەپ بولعانى ازىرگە بەلگىسىز.
«سەبەبىن ناقتى ايتا المايمىن. بالكىم تەحنيكالىق اقاۋدان بولار نەمەسە قۇرىلعىلار قىسىمدى كوتەرە المادى ما؟ بىلمەيمىن. ءتىپتى، ەلەكتر جەلىسى ءۇزىلدى مە، ازىرگە تۇسىنىكسىز. ءبىر ايتارىم، بۇل – 20 جىلدىق تاجىريبەمىزدە ءبىرىنشى رەت تىركەلگەن جاعداي»، – دەدى كومپانيانىڭ باس ديرەكتورى ۆلاديمير پاك.
قالا اۋماعىنداعى بۇل زاۋىتتان بالمۇزداقتان بولەك، تۇشپارا مەن وزگە دە تاعامدار شىعارىلادى. ال «اممياكتى» سول ونىمدەردى دايىنداۋ بارىسىندا قولداناتىن قۇرىلعىلارعا پايدالانادى ەكەن. كومپانيا ديرەكتورىنىڭ ايتۋىنشا، وتكىر ءيىستى ءتۇسسىز گاز تاڭعا جۋىق توگىلگەن.
سالدارىنان 5 ادام ۋلانىپ، ەس بىلمەي اۋرۋحاناعا تۇسكەن وقيعاعا قاتىستى توتەنشەلىكتەر دە، سانيتارلىق-ەپيدەميولوگيالىق باقىلاۋ دەپاترامەنتىنىڭ وكىلدەرى دە جاۋاپ بەرمەدى. ال زاۋىت ءقازىر جۇمىسىن جالعاستىرىپ جاتىر.