بالالاردىڭ قوعامدىق ورىندارعا بارۋىن شەكتەۋگە تىرىسۋ كەرەك.
COVID-19 بەيىمدەلىپ، مۋتاسياعا ۇشىرادى. ەگەر وتكەن جىلى الماتىدا دەرتتىڭ اۋىر تۇرىمەن اۋرۋحاناعا جاتقىزىلعان بالالاردىڭ سانى 10-15%-دان اسپاسا، بيىل جاڭا شتامم ينفەكسيانىڭ اعىمىنا جانە بەلگىلەرىنە وزگەرىستەر ەنگىزدى. بۇل تۋرالى قالالىق كلينيكالىق بالالاردىڭ ينفەكسيالىق اۋرۋحاناسىنىڭ باس دارىگەرى ەرجان سەرالين ايتتى، دەپ حابارلايدى Almaty-akshamy.kz.
ەرجان سەراليننىڭ ايتۋىنشا، بالالار كوروناۆيرۋسپەن ءجيى اۋىرادى، ءبىراق ولاردا اۋرۋعا ەرەسەكتەردەگىدەي يممۋندىق جاۋاپ جوق، ادەتتە اۋرۋدىڭ اعىمى ولاردا جەڭىل بولادى.
«بۇل بالالارعا ساق بولۋ قاجەت ەمەس دەگەندى بىلدىرمەيدى، ويتكەنى بالالاردىڭ السىرەگەن يممۋنيتەتپەن دەرتتى جۇقتىرۋى، سوزىلمالى اۋرۋلارى بولسا، وندا كوروناۆيرۋستىڭ ءقاۋىپتى بولۋى مۇمكىن ەكەنىن ۇمىتپاعان ءجون»، - دەدى باس دارىگەر.
ونىڭ ۇستىنە، بالالار – كوروناۆيرۋستىڭ امبەباپ تاسىمالداۋشىلارى، سوندىقتان ەرەسەكتەر جاۋاپتى بولۋى كەرەك، ۆاكسينالانعان بولسا دا، قوعامدىق ورىنداردا بەتپەردە مەن الەۋمەتتىك قاشىقتىقتى ەسكەرگەن ءجون.
ەرجان سەرالين ينفەكسياعا ءبىر جاسقا دەيىنگى بالالاردىڭ دا بەيىم ەكەنىن ايتتى.
«جاس شەكتەۋى جوق، كوبىنەسە بۇل ءموبيلدى جاستاعى بالالار. كلينيكالىق كورىنىسكە كەلەتىن بولساق، ەگەر وتكەن جىلى كاتارالدى بەلگىلەر باسىم بولسا، بيىل كاتارالدى سيندروممەن قاتار اسقازان-ىشەك جولدارىنىڭ بۇزىلۋ جيىلىگى، سونداي-اق لەتارگيا، اپپەتيت پەن تەمپەراتۋرانىڭ تومەندەۋى سياقتى جالپى ينتوكسيكاسيا بەلگىلەرى بايقالادى. ءبىزدىڭ اۋرۋحاناعا ورتاشا اۋىرلىقتاعى بالالار ءجيى تۇسەدى. دەرتى اسقىنعان بالالار دا بولادى. ارينە، دەرتتىڭ اۋىرلىعى مەن بارىسى بالانىڭ باستاپقى جاعدايىنا، انامنەزدە بۇرىننان بار اۋرۋلاردىڭ قاتار جۇرۋىنە دە بايلانىستى ەكەنىن اتاپ وتكەن ءجون»، - دەدى ەرجان سەرالين.
قالالىق كلينيكالىق بالالاردىڭ ينفەكسيالىق اۋرۋحاناسىنىڭ باس دارىگەرىنىڭ ايتۋىنشا، بالالار دەرتتى ۇيدەگى ەرەسەكتەرمەن بايلانىس كەزىندە جۇقتىرادى.
«بالالار اراسىنداعى دەرت جۇقتىرۋ ەرەسەك تۇرعىندار اراسىندا جۇقتىرۋدىڭ ارتىمەن تىكەلەي بايلانىستى. ەرەسەكتەر اراسىندا جۇقتىرۋ تومەندەسە، وندا بالالار اراسىندا ىندەت جۇقتىرۋ دا ازايادى. ال دەرتتىڭ الدىن الاتىن جالپىعا ورتاق جالعىز ءتيىمدى جول - ۆاكسينا سالدىرۋ. سوندا عانا ءبىز ءوزىمىزدى دە، بالالارىمىزدى دا ءقاۋىپتى دەرتتەن قورعاي الامىز»، - دەپ جالعاستىردى ءسوزىن ەرجان سەرالين.
بالالارداعى كوروناۆيرۋستىڭ اسقىنۋى پنيەۆمونيانىڭ ورشۋىنەن بايقالادى، ءجيى ەمەس، ءبىراق ءقاۋىپتى پوستكوۆيدتى قابىنۋ سيندرومى كوپتەگەن ورگاندار مەن جۇيەلەردىڭ زاقىمدايدى.
«ءبىزدىڭ كلينيكادا جۇقپالى اۋرۋلاردىڭ جەتەكشى ماماندارى مەن رەانيماتولوگتار، مامانداندىرىلعان نيەۆروپاتولوگتار، كارديولوگتار، پۋلمونولوگتار، ەندوكرينولوگتار، نەفرولوگتار، حيرۋرگتار تاۋلىك بويى بايلانىستا بولاتىن مۋلتيديسيپلينارلى توپ قۇرىلدى. ءاربىر كۇردەلى كلينيكالىق جاعداي تالقىلاۋعا شىعارىلادى. قاجەت بولعان جاعدايدا سوزىلمالى اۋرۋلارعا قارسى تەراپيالىق كوررەكسيا جۇرگىزىلەدى. ءبىز ءار بالاعا وتە مۇقيات قارايمىز، بارلىق قاجەت ساراپتامالار مەن قوسىمشا تەكسەرۋلەردى ۇلكەن جاۋاپكەرشىلىكپەن جۇرگىزەمىز»، - دەدى ەرجان سەرالين.
دارىگەر ادامدار كوپ جينالاتىن جەرلەرگە، قوعامدىق كولىكتە، كافەلەر مەن ساۋدا ورتالىقتارىنا بارعاندا ينفەكسيا ءقاۋپى ءالى دە جوعارى ەكەنىن ەسكە سالدى. سوندىقتان بۇرىنعىداي الدىن الۋ شارالارىن ساقتاپ، بالالارعا وسىنى ۇيرەتۋ قاجەت.
«جاقىندا، كوروناۆيرۋستان باسقا، ماۋسىمدىق جرۆي جانە تۇماۋ اۋرۋلارى بەلەڭ الاتىن بولادى. كوروناۆيرۋستان ايىرماشىلىعى، بۇل ينفەكسيالار بالالاردى ايامايدى جانە ولاردا ەرەسەكتەرگە قاراعاندا اۋىر بولۋى مۇمكىن. سوندىقتان، بۇگىندە بالالاردىڭ قوعامدىق ورىندارعا بارۋىن شەكتەۋگە تىرىسۋ كەرەك جانە قاجەت بولعان جاعدايدا عانا ولارمەن بىرگە بولىپ، قوعامدىق كولىكتە قاشىقتىقتى ساقتاۋ جانە مەديسينالىق ماسكانى دۇرىس تاعۋ كەرەك»، - دەپ ۇسىنىس ءبىلدىردى دارىگەر.