الماتىدا التى جاسار بالا اعالارىمەن بىرگە ويىن-ساۋىق كەشەنىندە باتۋتتا كوڭىل كوتەرىپ، جاسىرىنباق ويناپ ءجۇرىپ، شاحتاعا قۇلاپ كەتكەن.
ءابدىراحماننىڭ اتا-اناسى سەگىز جىل كۇتكەن ۇلىنان ايىرىلىپ قالا جازدادى. بالا «اۆاتاريا» ويىن-ساۋىق كەشەنىندە شاحتاعا قۇلاپ، جاراقات العان، دەپ حابارلايدى Almaty-akshamy.kz Astanatv.kz-كە سىلتەمە جاساپ.
ونىڭ ەكى اياعىنىڭ باشپايلارى سىنعان. ميى شايقالىپ، قولتىق استىنداعى بۇلشىقەتتەرىنە زاقىم كەلگەن. ول ءبىر اي بويى جۇرە الماي، مۇگەدەكتەر ارباسىندا وتىردى.
بالا بىرنەشە قاباتقا ۇشىپ، مەديسينالىق ورتالىقتىڭ شاتىرىنا قۇلاپتى. وعان العاشقى مەديسينالىق كومەك سول جەردە كورسەتىلگەن.
ويىن-ساۋىق ورتالىعىنىڭ وكىلدەرى بارلىق شىعىندى، سونىڭ ىشىندە وتەماقى تولەۋگە دايىن ەكەندەرىن ايتقانىمەن، جابىرلەنۋشىلەر تىم كوپ اقشا سۇراعان كورىنەدى.
«ارينە، ءبىز اتا-انالاردان كەشىرىم سۇرايمىز، ءبىراق بۇل ءىس ءالى جالعاسۋدا. ءيا، بۇل تەحنيكالىق بولمە. ياعني، ءبىز ازداپ قاداعالامادىق»، – دەدى كومپانيا وكىلى ەلەنا كيم.
ءىس بويىنشا پوليسيا جۇمىس ىستەپ جاتىر.