الماتى قالاسىنىڭ اۋەزوۆ اۋدانىندا جول-كولىك ينفراقۇرىلىمىن جاڭعىرتۋ جانە قاۋىپسىزدىك دەڭگەيىن ارتتىرۋ بويىنشا جۇيەلى جۇمىس جالعاسىپ جاتىر.
بۇل شارالار تۇرعىنداردىڭ ءومىر ءسۇرۋ ساپاسىن جاقسارتۋعا، كولىك قولجەتىمدىلىگىن ارتتىرۋعا جانە كوشەلەردەگى ءتارتىپتى قامتاماسىز ەتۋگە باعىتتالعان. بۇل تۋرالى الماتى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا اۋدان اكىمى ابزال ەگەمبەردييەۆ مالىمدەدى.
بيىل 20 مىڭ شارشى مەتر جول اعىمداعى جوندەۋدەن وتكىزىلىپ، 10 مىڭ شارشى مەتر تەحنيكالىق تروتۋار توسەلدى، سونداي-اق 5 شاقىرىم ارىق جەلىسى سالىندى.
قوعامدىق كولىك ساپاسىن ارتتىرۋعا دا ەرەكشە كوڭىل بولىنۋدە. 2024 جىلى اۆتوبۋس پاركى ايتارلىقتاي جاڭارتىلىپ، كولىك سانى 1 325-تەن 1 563-كە دەيىن كوبەيدى. بۇل 8 جاڭا مارشرۋت اشۋعا، 13 قولدانىستاعى باعىتتى جاڭارتىپ، كۇشەيتۋگە مۇمكىندىك بەردى. ناتيجەسىندە اۋداننىڭ ءارتۇرلى بولىكتەرىندە قوعامدىق كولىكتىڭ تۇراقتىلىعى مەن قولجەتىمدىلىگى ايتارلىقتاي ارتتى.
سونىمەن قاتار، قۇقىقتىق ءتارتىپ پەن قوعامدىق قاۋىپسىزدىكتى قامتاماسىز ەتۋ شارالارى دا قاتار جۇرگىزىلۋدە. 2024 جىلى اۋدان اۋماعىنا 153 «سەرگەك» اپپاراتتىق-باعدارلامالىق كەشەنى مەن 1 027 بەينەباقىلاۋ كامەراسى ورناتىلدى. بۇل جول قوزعالىسىن باقىلاۋدى كۇشەيتىپ، قۇقىق بۇزۋشىلىقتار سانىن ازايتۋعا جانە توتەنشە جاعدايلارعا جەدەل ارەكەت ەتۋگە مۇمكىندىك بەردى.
وسىلايشا، اۋەزوۆ اۋدانى قالالىق ورتانى كەشەندى جاڭارتۋعا باتىل قادام جاساپ كەلەدى. كولىك جانە ينجەنەرلىك ينفراقۇرىلىمدى، قاۋىپسىزدىك جۇيەلەرىن جانە قوعامدىق كولىكتى اۋقىمدى تۇردە دامىتۋ – جايلى ءارى ساپالى قالالىق ءومىردىڭ جاڭا دەڭگەيىن قالىپتاستىرىپ جاتىر.