الماتىداعى اتىس بويىنشا ەكى قىلمىستىق ءىس قوزعالدى

الماتىداعى اتىس وقيعاسىنا كىنالى ادام 20 جىلعا دەيىن نەمەسە ءومىر بويى باس بوستاندىعىنان ايىرىلۋى مۇمكىن

الماتىداعى اتىس بويىنشا ەكى قىلمىستىق ءىس قوزعالدى. بۇل تۋرالى بريفينگ بارىسىندا قالالىق پوليسيا دەپارتامەنتىنىڭ باسشىسى قانات تايمەردەنوۆ ءمالىم ەتتى، دەپ حابارلايدى Almaty-akshamy.kz.

قازاقپارات اگەنتتىگىنىڭ اقپاراتى بويىنشا، كۇدىكتى ۋاقىتشا ۇستاۋ يزولياتورىنا قامالدى. ودان جاۋاپ الىنىپ جاتىر. مالىمەتتەر انىقتالۋدا.

قانات تايمەردەنوۆتىڭ سوزىنشە، كۇدىكتىنىڭ اتىنا قارۋ 2008 جىلى تىركەلگەن، ول پسيحياتريالىق ديسپانسەردە ەسەپتە جوق. ونىڭ ايتۋىنشا، ۆەدومستۆوارالىق جەدەل توپ قۇرىلدى، الداعى ۋاقىتتا تەرگەۋ ناتيجەلەرى بويىنشا پوليسيا تولىق اقپارات بەرەتىن بولادى.

«قىزمەت بارىسىندا قازا بولعان پوليسيا قىزمەتكەرلەرىنىڭ وتباسىلارىنا كومەك كورسەتىلەدى. ولاردىڭ كامەلەتتىك جاسقا تولماعان بالالارى بار»،- دەدى سپيكەر.

بۇعان دەيىن باقىتجان ساعىنتايەۆ ولاردىڭ وتباسىنا ءتيىستى كومەك كورسەتىلەتىنى تۋرالى ايتقان بولاتىن. كەيىنىرەك جەكە سوت ورىنداۋشىلارىنىڭ پالاتاسى وقيعاعا قاتىستى تۇسىنىكتەمە بەردى. ايتا كەتەيىك، وسىعان دەيىن الماتىدا اتىس بولىپ، 5 ادامنىڭ قازا تاپقانىن حابارلاعان بولاتىنبىز. اتالعان جاعداي بويىنشا سوتقا دەيىنگى تەرگەۋ امالدارى باستالدى. كىنالى ادام 20 جىلعا دەيىن نەمەسە ءومىر بويىنا باس بوستاندىعىنان ايىرىلۋى مۇمكىن.