ءونىم قولدانىسقا جونەلتىلمەي تۇرىپ، ارنايى زەرتحانادا تەكسەرۋدەن وتەدى
الماتىداعى اسفالتبەتون زاۋىتىندا ساعاتىنا 300 توننادان استام ءونىم شىعاراتىن جاڭا قۇرىلعى ىسكە قوسىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
مامانداردىڭ ايتۋىنشا، حالىقارالىق ستاندارتقا ساي بۇل قۇرىلعى الدىڭعىعا قاراعاندا 3 ەسە مىقتى. ماسەلەن، ءقازىر ساعاتىنا 300 توننادان استام اسفالتبەتون ءوندىرىپ جاتىر. وندىرىلگەن ءونىم ءوز رەتىندە رەسپۋبليكالىق ماڭىزى بار تاس جولعا جانە قالاداعى كوشەلەردىڭ قۇرىلىسى بارىسىندا قولدانىلادى.
«الماتىدان 100 شاقىرىمداي جەرگە دەيىن تاسىمالدانادى. الايدا اسفالتبەتوننىڭ كوپ بولىگى شاھارداعى كوشەلەرگە توسەلەدى. جاڭا قۇرىلعىنىڭ ارقاسىندا ءونىم دايىنداۋ جىلدامدىعى دا، ساپاسى دا ارتتى»، – دەدى ءوندىرىس باسشىسى الەكساندر ستەفانوۆ.
مامانداردىڭ ايتۋىنشا، بۇرىن تۇرعان قۇرىلعى ساعاتىنا 100 توننادان اسپايتىن ءونىم عانا بەرگەن. سوندىقتان جۇك كولىكتەرى ۇزىن سونار كەزەكتە تۇراتىن دەيدى. زاۋىتقا كەلگەن شەتەلدىك ماماندار دا جاڭا قۇرىلعىنىڭ جۇمىسىمەن تانىسىپ، جالپى ءوندىرىس ورنىنا ءوز باعاسىن بەردى.
«اياداي عانا جەردە اۋقىمدى جۇمىس جۇرگىزىلىپ جاتقانى مەنى تاڭعالدىردى. بۇل جەردى ءوز كوزىممەن كورىپ، وزگەشە ادىستەردى بايقادىم. مۇنداعى قىزمەتكەرلەر ءوز ءىسىنىڭ مايتالمانى ەكەنىن اڭعاردىم»، – دەدى شەتەلدىك كومپانيا وكىلى مەدس دجەنەفك (دانيا).
زاۋىت اۋماعىندا اسفالبەتون وندىرىسىنە ارنالعان 4 قۇرىلعى بار. ولار المانيادان جانە يتاليادان اكەلىنگەن. ودان شىققان ءونىم قولدانىسقا جونەلتىلمەي تۇرىپ، ارنايى زەرتحانادا تەكسەرۋدەن وتەدى.