كۇدىكتى ءقازىر قاماۋدا.
62 جاستاعى ايەل الەۋمەتتىك قىزمەتكەردىڭ اتىن جامىلىپ، زەينەتكەرلەردى الداعان، دەپ حابارلايدى Almaty-akshamy.kz Polisia.kz-كە سىلتەمە جاساپ.
الماتىدا ءوزىن الەۋمەتتىك قىزمەتكەرمىن دەپ تانىستىرعان 62 جاستاعى ايەل ۇستالدى.
«كۇدىكتى ءوزىن الەۋمەتتىك قىزمەتكەر رەتىندە تانىستىرىپ، قارتتارعا ازىق-تۇلىك جەتكىزۋگە جانە قامقورلىق جاساۋعا كومەكتەسۋدى ۇسىندى. اۋدان تۇرعىنىنان پوليسياعا ءوز سەنگىشتىگىنىڭ قۇربانى بولعانى تۋرالى ارىز كەلىپ ءتۇستى. اقشانى الۋ مەحانيزمى قاراپايىم بولدى: ايەل ءوزىن الەۋمەتتىك قىزمەتكەرمىن دەپ تانىستىرىپ، ازىق-تۇلىك دۇكەنىنە بارىپ كەلۋدى ۇسىنىپ، زەينەتكەردەن بىرنەشە رەت اقشا اۋىستىرىپ بەرۋىن سۇراعان، ال جيناقتىڭ قايدا ساقتالعانىن كورگەننەن كەيىن، قولايلى ساتتە 3 ميلليون تەڭگەنى ۇرلاپ كەتكەن. كۇدىكتى ءقازىر قاماۋدا. ۇرلانعان اقشانىڭ ءبىر بولىگى تاركىلەندى»، – دەدى بوستاندىق اۋداندىق پوليسيا باسقارماسىنىڭ باستىعى ماقسات قاناپيايەۆ.
كۇدىكتىنىڭ وسىنداي ارەكەتى ءۇشىن بىرنەشە رەت قىلمىستىق جاۋاپكەرشىلىككە تارتىلعانى انىقتالدى. اتالعان دەرەك بويىنشا سوتقا دەيىنگى تەرگەۋ باستالدى.