قاراجات جەرگىلىكتى بيۋدجەتتەن بولىنگەن.
الماتى قالاسىنىڭ ءماسليحاتى «Almaty Business-2025» وڭىرلىك باعدارلاماسىنا 2022 جىلعى قاڭتارداعى جاپپاي تارتىپسىزدىكتەر بارىسىندا زارداپ شەككەن شاعىن جانە ورتا بيزنەس سۋبەكتىلەرى ءۇشىن جاڭا نەسيەلىك ءونىم ەنگىزۋ بولىگىندە وزگەرىستەردى بەكىتتى. جەڭىلدىكتى نەسيەلەۋ 12 ايعا دەيىنگى مەرزىمگە جىلدىق 2%-بەن 10 ملن تەڭگەگە دەيىن اينالىم قاراجاتىن تولىقتىرۋ ءۇشىن قاراستىرىلعان. قارىز كەپىلگە نەمەسە «الماتى» اكك» اق ءىشىنارا كەپىلدىگىمەن بەرىلەدى، دەپ حابارلايدى Almaty-akshamy.kz.
قاراجات جەرگىلىكتى بيۋدجەتتەن بولىنگەن، باعدارلاما وپەراتورى «Almaty» مقۇ» ج ش س بولىپ تابىلادى. كاسىپكەرلەرگە ءوتىنىم بەرۋ ءۇشىن مىنا مەكەنجايعا حابارلاسۋ قاجەت: الماتى ق.، بايزاقوۆ كوشەسى 303، كاب 201، الماتى مقۇ كەڭسەسى، انىقتاما تەلەفونى 2810 (ۇيالى تەلەفوننان تەگىن)، +7 727 356 02 80 (قالالىق نومىرلەردەن).
بۇرىندارى ءحاوت ساناتىنداعى (حالىقتىڭ الەۋمەتتىك وسال توپتارى) تۇلعالارعا جانە وندىرىستىك پاركتەردىڭ رەزيدەنتتەرىنە «Almaty Business-2025» باعدارلاماسى اياسىندا جىلدىق 2%-بەن جەڭىلدەتىلگەن نەسيەگە قاراستىرىلعان بولاتىن.
سونىمەن قاتار، الماتىدا زارداپ شەككەن شوب سۋبەكتىلەرى كوممۋنالدىق شىعىنداردان 3 ايعا، قالانىڭ كوممۋنالدىق مەنشىگىن جالعا الۋشىلار 6 ايعا جالداۋ اقىسىنان بوساتىلدى. قوسىمشا، «Almaty Finance» ج ش س جانە «Almaty» مقۇ» جشس-دا ولارعا نەگىزگى قارىزدى وتەۋ بويىنشا مەرزىم كەيىنگە قالدىرىلدى، 180 كۇنگە دەيىنگى مەرزىمگە نەسيەلىك مىندەتتەمەلەر بويىنشا ايىپپۇلدار مەن ءوسىمپۇلدار جويىلدى.