ءۇش كۇن ىشىندە 211 زاڭسىز ساۋدا ورنى الىنىپ تاستالدى.
الماتىدا قالا اكىمى ەربولات دوسايەۆتىڭ تاپسىرماسىمەن مەملەكەتتىك قوردىڭ جەرىندە ورنالاسقان رۇقساتسىز سالىنعان ساۋدا ورىندارى مەن ستاسيونارلىق ەمەس ساۋدا نىساندارىن (سەسن) بۇزۋ جۇمىستارى باستالدى، دەپ حابارلايدى aqshamnews.kz
بۇل شارانىڭ ماقساتى – رەتسىز ساۋدامەن كۇرەس جانە قالا كەڭىستىگىندەگى قاۋىپسىزدىكتى ارتتىرۋ.
ءۇش كۇن ىشىندە مەملەكەتتىك جانە قۇقىق قورعاۋ ورگاندارىنىڭ وكىلدەرى، ءماسليحات دەپۋتاتتارى مەن قوعامدىق كەڭەس مۇشەلەرىنەن قۇرالعان كوميسسيا 211 زاڭسىز ساۋدا ورنىن (102 دۇڭگىرشەك جانە 109 كۇش ولشەگىش) بۇزىپ، 270 كاسىپكەرگە ەسكەرتۋ حات بەرىلدى.
ايتا كەتۋ كەرەك، قىزمەت تۇرىنە قاراماستان، بارلىق زاڭسىز ساۋدا نىساندارى بۇزىلۋدا. اسىرەسە، كوشە تاعامدارىن ساتاتىن ورىندارعا ەرەكشە نازار اۋدارىلۋدا. مۇنداي بىرنەشە نىسان، اتاپ ايتقاندا، اباي داڭعىلىنداعى مەملەكەتتىك سيرك ماڭىندا ءسۇرىلدى. اتالعان ساۋدا ورىندارى ينجەنەرلىك جەلىلەرگە، ەلەكتر ەنەرگياسىنا قوسىلماعان، كورىكتەندىرۋ ەرەجەلەرىن بۇزادى. قالا تۇرعىندارى مۇنداي جەرلەردە تاماق ساتىپ الۋ دەنساۋلىققا ءقاۋىپتى ەكەنىن ايتۋدا.
«زاڭسىز دۇڭگىرشەكتەر كوبىنەسە ارىقتاردىڭ ۇستىنە قويىلادى، سانيتارلىق نورما ساقتالماعان، دارەتحانا جوق. ولار مەكتەپتەردىڭ، بالالار جۇرەتىن ورىنداردىڭ جانىندا ورنالاسقان. كەيىن تاماقتان ۋلانۋى عاجاپ ەمەس»، – دەيدى قالا تۇرعىنى ەۆگەنيي بوگاچيەۆ.
قالانىڭ ءماسليحات دەپۋتاتى، كورىكتەندىرۋ ماسەلەلەرىمەن بەلسەندى اينالىسىپ جۇرگەن تيمۋر ەلەۋسىزوۆ بۇزىلعان ساۋدا ورىندارىنىڭ بارلىعى ەلەكتر جەلىلەرىنە زاڭسىز قوسىلعانىن، بۇل قالانىڭ ينفراقۇرىلىمىنا قوسىمشا جۇكتەمە تۇسىرەتىنىن اتاپ ءوتتى.
«بۇل قالانىڭ ەلەكتر جەلىلەرىنە ارتىق جۇكتەمە تۇسىرەدى. ولاردىڭ قىزمەتىن رەتتەۋ ءۇشىن وسىنداي باستامالاردى قولداۋ قاجەت»، – دەدى ول.
ەسكە سالا كەتەيىك، الماتى اكىمدىگىنىڭ 2024 جىلى 27 تامىزداعى №3/469 قاۋلىسىنا سايكەس، قالا اۋماعىندا 157 سەسن ورنالاستىرۋعا ارنالعان 142 ورىن بەكىتىلگەن.
كاسىپكەرلىك قىزمەتىن زاڭ اياسىندا جالعاستىرعىسى كەلەتىن كاسىپكەرلەر الماتى قالاسىنىڭ كاسىپكەرلىك جانە ينۆەستيسيالار باسقارماسىنا 390 21 30 تەلەفونى ارقىلى جۇگىنە الادى.
جالپى، الماتىدا بارلىعى 500-گە جۋىق زاڭسىز نىسان بۇزىلماق. سەسن-دى انىقتاۋ جانە ءسۇرۋ جۇمىستارى جالعاسادى.