الماتىدا زاڭسىز ورناتىلعان تاعى ءۇش دۇڭگىرشەك ءسۇرىلدى

وربيتا-4 شاعىن اۋدانىنداعى مۇستافين مەن ءبىرجان كوشەلەرىنىڭ قيىلىسىندا زاڭسىز ورناتىلعان ءۇش دۇڭگىرشەك ءسۇرىلدى، دەپ حابارلايدى almaty-akshamy.kz

قالانىڭ سىرتقى كەلبەتىنە نۇقسان كەلتىرەتىن، اباتتاندىرۋدى بۇزاتىن، تروتۋارلار مەن جول ۋچاسكەلەرىنە قوقىس تاستايتىن زاڭسىز ورناتىلعان ستاسيونارلىق ەمەس ساۋدا نىساندارىن (سسن) جويۋ ماقساتىندا كاسىپكەرلىك جانە ينۆەستيسيالار باسقارماسى قالا اكىمى ەربولات دوسايەۆتىڭ تاپسىرماسى بويىنشا قاجەتتى شارالار قابىلداۋدا.

الماتى قالاسى كاسىپكەرلىك جانە ينۆەستيسيالار باسقارماسىنىڭ قىزمەتكەرلەرى ساۋدا جاساۋعا رۇقسات قۇجاتتارىنىڭ جوقتىعىن انىقتادى. زاڭسىز ورناتىلعان ساۋدا نىساندارىنىڭ يەلەرىمەن ءتۇسىندىرۋ جۇمىستارى جۇرگىزىلدى، سودان كەيىن كاسىپكەرلەر وبەكتىلەردى وزدەرى سۇرە باستادى. مەنشىك يەلەرى وزدەرى بۇزباسا، زاڭسىز ورناتىلعان ستاسيونارلىق ەمەس ساۋدا نىساندارى ءماجبۇرلى تۇردە سۇرىلەتىن بولادى.

ادەتتە، زاڭسىز ورناتىلعان دۇڭگىرشەكتەر اباتتاندىرۋ ەرەجەلەرىن ساقتاماي، قالا قۇرىلىسى، سانيتارلىق-ەپيدەميولوگيالىق جانە ورتكە قارسى نورمالاردى بۇزا وتىرىپ، تروتۋارلار مەن جول جيەكتەرىندە ورنالاسقان.

ەسكە سالساق، الماتى اكىمى ەربولات دوسايەۆتىڭ تاپسىرماسى بويىنشا بيىل العاش رەت «الماتى قالاسىنىڭ اۋماعىندا جانە قالا ماڭىنداعى ايماقتا ستاسيونارلىق ەمەس ساۋدا نىساندارىن ورناتۋ ەرەجەلەرى» قابىلداندى، وندا سسن ستاسيونارلىق ەمەس ساۋدا نىساندارىن ورناتۋ ءتارتىبى ناقتى ايقىندالعان. ەرەجەلەرمەن تولىعىراق https://adilet.zan.kz/rus/docs/V23R0001707 سىلتەمە ارقىلى تانىسۋعا بولادى.