مەملەكەتتىك قور جەرءىندە زاڭسىز ورناتىلعان ستاسيونارلىق ەمەس ساۋدا نىساندارىن (ءارى قاراي – سەسن) جويۋ جانە رەتسىز ساۋدامەن كۇرەسۋ ماقساتىندا الماتى قالاسىنىڭ كاسىپكەرلىك جانە ينۆەستيسيالار باسقارماسى 2025 جىلدىڭ 27 قاڭتارى مەن 17 اقپانى ارالىعىندا سەسن جاپپاي بۇزۋ جۇمىستارىن جوسپارلاپ وتىر، دەپ حابارلايدى aqshamnews.kz
قالانىڭ بارلىق اۋدانىندا ارنايى جۇمىس كوميسسياسى قۇرىلدى. ولاردىڭ قۇرامىنا مەملەكەتتىك ورگانداردىڭ، الماتى قالاسى پوليسيا دەپارتامەنتىنىڭ وكىلدەرى، ءماسليحات دەپۋتاتتارى، قوعامدىق كەڭەس مۇشەلەرى جانە «اتامەكەن» ق ر ۇكپ وكىلدەرى كىردى. سونىمەن قاتار قالا پروكۋراتۋراسى كوشە ساۋداسىنىڭ زاڭدىلىعىن قامتاماسىز ەتۋ بويىنشا شارالاردى كۇشەيتتى.
بۇزۋ بارىسىندا ينجەنەرلىك-كوممۋنيكاسيالىق جەلىلەردەن، ەلەكتر قۋاتىنان جانە سۋمەن جابدىقتاۋ جۇيەلەرىنەن اجىراتۋ كوزدەلگەن. پوليسيا دەپارتامەنتى اۋدان اكىمدىكتەرىمەن بىرلەسە وتىرىپ، ءسۇرۋ ورنىندا قوعامدىق ءتارتىپ پەن قاۋىپسىزدىكتى قامتاماسىز ەتەدى.
بۇگىندە قالادا مەملەكەتتىك قوردىڭ جەرىندە 500 جۋىق زاڭسىز ورناتىلعان سەسن بار. ولار بويىنشا ەرىكتى تۇردە بۇزۋ كەرەكتىگى جايلى ەسكەرتۋلەردى بەرۋ جۇمىستارى باستالدى. سەسن-نىڭ العاشقى 200-دەن استام يەسى جازباشا ەسكەرتۋ الدى.
ەسكە سالا كەتەيىك، الماتى قالاسى اكىمدىگىنىڭ 2024 جىلعى 27 تامىزداعى №3/469 «الماتى قالاسى اۋماعىندا ستاسيونارلىق ەمەس ساۋدا نىساندارىن ورنالاسۋ ورنىن انىقتاۋ جانە بەكىتۋ تۋرالى» قاۋلىسىنا سايكەس، قالادا 157 سەسن ورنالاستىرۋعا ارنالعان 142 ورىن بەكىتىلگەن. ستاسيونارلىق ەمەس ساۋدا نىساندارىندا زاڭدى نەگىزدە قىزمەتىن جالعاستىرۋعا نيەت بىلدىرگەن كاسىپكەرلەر الماتى قالاسىنىڭ كاسىپكەرلىك جانە ينۆەستيسيالار باسقارماسىنا 390 21 30 تەلەفونى ارقىلى حابارلاسا الادى.
سونىمەن قاتار، قالادا رەتسىز ساۋدا دەڭگەيىن تومەندەتۋ بويىنشا جۇمىستار جۇرگىزىلۋدە. مونيتورينگ ناتيجەسىندە قالانىڭ 49 جەرىندە رەتسىز ساۋدانىڭ جاپپاي شوعىرلانعان ورىندارى انىقتالدى (ءىرى بازارلار، ساياباقتار مەن الاڭداردىڭ ماڭىندا)، بۇل جەرلەردە 1،2 مىڭنان استام ساۋداگەر زاڭسىز ورنالاسقان. رەتسىز ساۋداعا قاتىستى ق ر اقبتك-نىڭ 204-بابى («بەلگىلەنبەگەن ورىنداردا ساۋدا جاساۋ») جانە 505-بابى («قالالار مەن ەلدى مەكەندەردىڭ اۋماقتارىن اباتتاندىرۋ ەرەجەلەرىن بۇزۋ») بويىنشا اكىمشىلىك شارالار قولدانىلادى. 2024 جىلى پوليسيامەن بىرلەسكەن رەيدتەر بارىسىندا 1،9 مىڭنان استام رەتسىز ساۋدا سۋبەكتىسىنە اكىمشىلىك جاۋاپكەرشىلىك جۇكتەلدى.
انىقتاما ءۇشىن:
الماتى قالاسىنىڭ كاسىپكەرلىك جانە ينۆەستيسيالار باسقارماسى ە-وتىنىش پلاتفورماسىندا، Open الماتى جانە الەۋمەتتىك جەلىلەردە تۇرعىنداردىڭ شاعىمى مەن ءوتىنىشى بويىنشا جۇرگىزگەن مونيتورينگ بارىسىندا زاڭسىز ورناتىلعان سەسن تاراپىنان كورىكتەندىرۋ ەرەجەلەرىن، ءورت قاۋىپسىزدىگى جانە سانيتارلىق نورمالاردى بۇزۋ، نىسانداردىڭ ديزاين-كودقا جانە قالانىڭ ەستەتيكالىق كەلبەتىنە سايكەس كەلمەۋ فاكتىلەرى انىقتالدى.
ەسكە سالا كەتەيىك، «الماتى قالاسىنىڭ اۋماعىندا جانە قالا ماڭى ايماعىندا ستاسيونارلىق ەمەس ساۋدا نىساندارىن ورناتۋ قاعيدالارىنا» سايكەس، ساۋدا نىساندارى جەر تەلىمىن جالعا الۋ قۇقىعى تۋرالى شارت نەگىزىندە ورناتىلۋعا ءتيىس. مىنا سىلتەمە ارقىلى ەرەجەمەن تولىعىراق تانىسۋعا بولادى: https://adilet.zan.kz/rus/docs/V23R0001707