الماتى قالاسىندا كوشى-قون زاڭناماسىن بۇزۋ فاكتىلەرىن انىقتاۋ جانە الدىن الۋ ماقساتىندا كوشى-قون قىزمەتى جۇيەلى تۇردە رەيدتىك ءىس-شارالار وتكىزۋدە.
وتكەن تاۋلىكتە تۇركسىب اۋدانىنداعى قۇرىلىس نىساندارىنىڭ بىرىندە جۇرگىزىلگەن تەكسەرۋ بارىسىندا ەلىمىزدە زاڭسىز ەڭبەك قىزمەتىمەن اينالىسىپ جۇرگەن 22 شەتەل ازاماتى انىقتالدى، دەپ حابارلايدى aqshamnews.kz Polisia.kz-كە سىلتەمە جاساپ.
ولاردىڭ 9-ىنا ءتيىستى رۇقساتسىز نەمەسە ۆيزا مەن قۇجاتتا كورسەتىلگەن ماقساتىنا سايكەس كەلمەيتىن جۇمىس اتقارعانى ءۇشىن اكىمشىلىك حاتتامالار تولتىرىلدى. ال قالعان 13 شەتەلدىككە پروفيلاكتيكالىق سيپاتتاعى شارالار قولدانىلىپ، بارلىعى الماتى قالاسى پوليسيا دەپارتامەنتىنىڭ قابىلداۋ-تاراتۋ ورنىنا ورنالاستىرىلدى. قازىرگى تاڭدا زاڭ تالاپتارىن بۇزا وتىرىپ شەتەلدىك جۇمىس كۇشىن پايدالانعان جۇمىس بەرۋشىلەردى جاۋاپكەرشىلىككە تارتۋ بويىنشا ءتيىستى شارالار قابىلدانىپ جاتىر. وسىعان ۇقساس تەكسەرۋ الاتاۋ اۋدانىندا دا جۇرگىزىلىپ، عيماراتتاردى جوندەۋمەن اينالىسىپ جۇرگەن تاعى 9 شەتەلدىك ازامات انىقتالدى. سونىمەن قاتار ناۋرىزباي اۋدانىندا جوسپارلى ءىس-شارالار اياسىندا شەتەلدىكتەردىڭ ۋاقىتشا جانە تۇراقتى مەكەنجايلارى، سونداي-اق قۇرىلىس نىساندارى تەكسەرىلدى. ناتيجەسىندە جەكە باسىن كۋالاندىراتىن قۇجاتسىز جۇرگەن 10 ازامات انىقتالىپ، ءتيىستى راسىمدەۋ جۇمىستارى جۇرگىزىلدى.
– ءبىز كوشى-قون زاڭناماسىن بۇزۋعا قاتىستى دەرەكتەردى انىقتاۋ جانە الدىن الۋ بويىنشا جۇمىسىمىزدى جۇيەلى تۇردە جالعاستىرىپ كەلەمىز. اسىرەسە، قۇرىلىس الاڭدارىندا تىركەۋسىز تۇرىپ، رۇقساتسىز ەڭبەك ەتەتىن شەتەلدىكتەرگە ەرەكشە نازار اۋدارامىز. ءاربىر انىقتالعان قۇقىق بۇزۋشىلىق بويىنشا زاڭ اياسىندا ناقتى شارالار قابىلدانادى. ءبىزدىڭ نەگىزگى ماقساتىمىز – قالامىزداعى قوعامدىق ءتارتىپ پەن قاۋىپسىزدىكتى قامتاماسىز ەتۋ، – دەدى الماتى قالالىق پوليسيا دەپارتامەنتى كوشى-قون قىزمەتى باسقارماسىنىڭ باستىعى ەركىن امانتايەۆ.