الماتىدا ۆەلوسيپەد مىنگەن قىزدى كولىگىمەن قاققان جۇرگىزۋشى ىزدەستىرىلۋدە، دەپ حابارلايدى almaty-akshamy.kz قازاقپاراتقا سىلتەمە جاساپ
الەۋمەتتىك جەلىدە كولىك قاققان قىزدىڭ ۆيدەوسى شىقتى. جەلى قولدانۋشىنىڭ مالىمەتى بويىنشا 4 ءساۋىر، كەشكى ساعات 18:00-دە دوستىق داڭعىلىندا 875ALS02 مەملەكەتتىك ءنومىرى بار اۆتوكولىك قاعىپ كەتكەن. وقيعا سالدارىنان قىز ءارتۇرلى دەنە جاراقاتتارىن الىپ، اۋرۋحاناعا جەتكىزىلگەن.
جول-كولىك وقيعاسىن مەدەۋ اۋداندىق پوليسيا باسقارماسىنىڭ قىزمەتكەرلەرى تىركەپ، تەكسەرۋ جۇرگىزىپ جاتىر.
الدىن الا مالىمەت بويىنشا اۆتوكولىك دوستىق داڭعىلىمەن وڭتۇستىك باعىتتا بارا جاتقانى انىقتالدى. قاراما-قارسى بەتكە بۇرىلۋ كەزىندە جۇرگىزۋشى ۆەلوسيپەدپەن كەلە جاتقان كامەلەتكە تولماعان قىزدى قاققان. قازىرگى ۋاقىتتا زارداپ شەگۋشى اۋرۋحانادا جاتىر. ونىڭ العان دەنە جاراقاتتارىنا سوت-مەديسينالىق ساراپتامالار تاعايىندالاتىن بولادى. سونىمەن قاتار، وقيعا بويىنشا ورنىنان جاسىرىنعان جۇرگىزۋشىنى انىقتاۋ بويىنشا ىزدەستىرۋ-انىقتاۋ ءىس-شارالارى جۇرگىزىلۋدە.