الماتىدا ۆاكسينالاۋ قارقىنىن ارتتىرۋ قاجەت، ويتكەنى جاعداي ناشارلاۋى مۇمكىن

ماماندار الماتىلىقتاردى بەلسەندى ۆاكسينالانۋعا شاقىردى.

بۇل تۋرالى قالالىق قوعامدىق دەنساۋلىق باسقارماسىنىڭ باسشىسى ناريمان تابىنبايەۆ مالىمدەدى. وڭىرلىك كوممۋنيكاسيالار قىزمەتىنىڭ الاڭىندا سويلەگەن سوزىندە ول كوروناۆيرۋستىق ينفەكسيانىڭ «ءتورتىنشى تولقىنى» ءالى اياقتالماعانىن ەسكە سالدى، دەپ حابارلايدى Almaty-akshamy.kz.

"ەپيدەميالىق جاعدايدىڭ جاقسارۋى كوروناۆيرۋستىڭ ءتورتىنشى تولقىنى اياقتالدى دەگەندى بىلدىرمەيدى"، - دەپ سانايدى ناريمان تابىنبايەۆ. سوندىقتان ول الماتىلىقتاردى بەلسەندى ۆاكسينالانۋعا شاقىردى.  

«بۇگىندە ۆاكسينانىڭ ءبىرىنشى كومپونەنتىن 899 784 ادام، ەكىنشى كومپونەنتىن 779 870 ادام الدى»، - دەپ حابارلادى ناريمان تابىنبايەۆ.

الماتى قدب باسشىسىنىڭ پىكىرىنشە، بۇل جەتكىلىكسىز، ويتكەنى ۇجىمدىق يممۋنيتەت ءالى قالىپتاسپاعان. ن. تابىنبايەۆ ستاسيونارلار شتاتتىق جۇمىس رەجيمىنە ورالاتىنىن، الايدا كوروناۆيرۋستىق جاعداي قايتادان ناشارلاۋى مۇمكىن ەكەنىن ەسكە سالدى.

«ەگەر ءبىز ىندەتكە قارسى شارالاردى ساقتاماساق، بۇل ورىن الۋى مۇمكىن. اسىرەسە، ءقازىر وقۋشىلار مەن ستۋدەنتتەر وففلاين وقۋعا كوشكەن كەزدە»، - دەدى ناريمان تابىنبايەۆ.