ەرجان باباقۇماروۆ: الماتىلىق پوليسەيلەر - تاباندىلىقتىڭ، ەرلىكتىڭ، باتىرلىقتىڭ ۇلگىسى
سالتاناتتى شاراعا قالا اكىمىنىڭ ورىنباسارى ەرجان باباقۇماروۆ، پوليسيا دەپارتامەنتىنىڭ باسشىسى قانات تايمەردەنوۆ، ارداگەرلەر جانە پوليسيا دەپارتامەنتىنىڭ جەكە قۇرامى قاتىستى. ەرجان باباقۇماروۆتىڭ ايتۋىنشا، مەگاپوليستە التى مىڭنان استام پوليسەي قىزمەت ەتەدى. پرەزيدەنت جارلىعىمەن 36 الماتىلىق پوليسەيگە پوليسيا گەنەرال-مايورى شەنى بەرىلدى.
«الماتى پوليسياسى قۇقىق قورعاۋ ورگاندارىنىڭ ەرلىگىنە ۇلگى بولا الادى. سوندىقتان الماتىلىقتار وزدەرىن تولىقتاي ءقاۋىپسىز سەزىنەدى. پاندەميانىڭ ەڭ قيىن جاعدايىندا دا، بۇكىل الەمدە قىلمىس ارتقان شاقتا الماتىلىق پوليسەيلەردىڭ ءتارتىپتى قامتاماسىز ەتكەندەرى سونشالىق، ءتىپتى، قىلمىس ەكى ەسەگە ازايدى. مۇنداي كورسەتكىشتەرمەن الەمنىڭ كەز كەلگەن قالاسى مەن قۇقىق قورعاۋ جۇيەسى ماقتانا الادى. ءوز ومىرلەرىڭىز بەن دەنساۋلىقتارىڭىزدى تاۋەكەلگە قويا وتىرىپ، تاۋلىك بويى شاھاردىڭ ءتارتىبى مەن قاۋىپسىزدىگىن قامتاماسىز ەتكەندەرىڭىز ءۇشىن ۇلكەن العىس ايتقىم كەلەدى. سىزدەرگە جاڭا ماڭىزدى جەتىستىكتەر، قىزمەتتەرىڭىزدە ساتتىلىك تىلەيمىن»، – دەدى ەرجان باباقۇماروۆ.
«مەملەكەت باسشىسى ءوز جولداۋىندا «جۇرتقا جاقىن پوليسيا» قاعيداسىن جۇزەگە اسىرۋدى اتاپ ءوتتى. وسىعان بايلانىستى الماتى قالاسى پد قىلمىسپەن كۇرەس جانە قوعامدىق ءتارتىپتى قورعاۋدا جاڭا فورمالاردى قولدانۋدا. الماتى قالالىق پوليسيا دەپارتامەنتى – قالا اكىمدىگىنىڭ قولداۋىمەن ەلدەگى ەڭ ۇزدىك ماتەريالدىق-تەحنيكالىق جاعىنان قامتاماسىز ەتىلگەن ىشكى ىستەر مينيسترلىگىنىڭ ءىرى قۇرىلىمدىق بولىمشەسى. سونىمەن قاتار وسى جىلى جاس پوليسيا قىزمەتكەرلەرىنە «الماتى جاستارى» قالالىق تۇرعىن ءۇي باعدارلاماسىنا قاتىسۋعا مۇمكىندىك بەرىلدى. ءقازىردىڭ وزىندە 14 ارىپتەسىمىز پاتەر الدى»، – دەدى الماتى قالالىق پوليسيا دەپارتامەنتىنىڭ باستىعى قانات تايمەردەنوۆ.
بۇگىندە الماتى پوليسياسىنا جاڭا ۆەدومستۆولىق ەمحانا مەن سپورت كەشەنى سالىنۋدا.
سپيكەردىڭ ايتۋىنشا، الماتى قالاسىنىڭ قىزمەتتەرى مەن پوليسيا بولىمشەلەرىنىڭ 166 قىزمەتكەرى وزدەرىنىڭ كاسىبي مەرەكەلەرىندە ماراپاتتالدى.