الماتى قالاسىنىڭ №2 قالالىق پەريناتالدىق ورتالىعىندا ۇشەم دۇنيەگە كەلدى.
38 جاستاعى قالا تۇرعىنى كەسار تىلىگى ارقىلى ءۇش قىزدى دۇنيەگە اكەلگەن، دەپ حابارلايدى aqshamnews.kz.
الماتى قالاسى قوعامدىق دەنساۋلىق ساقتاۋ باسقارماسىنىڭ مالىمەتىنشە، وتا ءساتتى وتكەن، جاڭا تۋعان نارەستەلەردىڭ سالماعى: 1970 گرامم، 1990 گرامم، 1960 گرامم.
2013، 2018 جانە 2019 جىلدارى ءۇش بالاسىن دۇنيە اكەلگەن انانىڭ بۇل - ءتورتىنشى جۇكتىلىگى.
"سابيلەر دۇنيەگە كەلگەننەن كەيىن جانساقتاۋ بولىمىندە بىرنەشە كۇن جاتىپ، قاجەت ەم الدى. ءقازىر ولار انالارىمەن بىرگە پالاتاعا اۋىستىرىلدى، جاعدايى جاقسى"، - دەدى نەوناتولوگيا ءبولىمىنىڭ مەڭگەرۋشىسى اينۇرىم سارباس.
ۇشەمنىڭ اناسىنىڭ ايتۋىنشا، العاشقى سكرينينگ كەزىندە بىردەن ءۇش ءسابي ەكەنىن بىلگەن.
"ۋدز دارىگەرى مەندە ءۇش ەمبريون بار دەگەندە تاڭعالدىم. ءبىزدىڭ اۋلەتىمىزدە اجەمنىڭ تاراپىندا ەگىز بولعان، ءبىراق ەشكىمدە ۇشەم بولعان ەمەس.
اناليزدەرىم جاقسى بولماعاندىقتان، وسى پەريناتالدىق ورتالىققا، پاتولوگيا بولىمىنە ءتۇستىم. دارىگەرلەردىڭ كۇش-جىگەرىنىڭ ارقاسىندا بالالاردىڭ سالماعى قاناعاتتانارلىق بولعاندا، كەسار تىلىگىن جاساۋدى ۇيعاردى. ەندى وتباسىمىزدا بەس قىز، ءبىر ۇل بولدى. وتە قۋانىشتىمىز!" - دەدى باقىتتى انا.
ايتا كەتەيىك، بيىل 10 ايدا الماتىدا 39 750 بالا دۇنيەگە كەلدى، ونىڭ 445ء-ى - ەگىز، 8ء-ى - ۇشەم.