مەملەكەت جانە قوعام قايراتكەرى، قازاقستان رەسپۋبليكاسى ىشكى ىستەر مينيسترلىگىنىڭ ەڭبەك سىڭىرگەن قىزمەتكەرى، «گەنەرالدار كەڭەسى» رەسپۋبليكالىق قوعامدىق بىرلەستىگى پرەزيديۋمىنىڭ العاشقى ءتوراعاسى، ادىلەت گەنەرال-مايورى رۇستەم قايداروۆتىڭ قايتىس بولعانىنا بەس جىل تولۋىنا وراي الماتىدا ەسكە الۋ شاراسى ۇيىمداستىرىلدى، دەپ حابارلايدى aqshamnews.kz.
Polisia.kzء-تىڭ حابارلاۋىنشا، شارا مارقۇمنىڭ وتباسى تۇرعان ءۇيدىڭ اۋلاسىندا ءوتىپ، وعان گەنەرال قايداروۆتىڭ تۋىستارى مەن جاقىندارى، ارىپتەستەرى، سونداي-اق الماتى قالالىق پوليسيا دەپارتامەنتىنىڭ باسشىلىعى مەن جەكە قۇرامى قاتىستى.
– رۇستەم ەسىمحان ۇلى قازاق پوليسياسىنىڭ دامۋىنا ولشەۋسىز ۇلەس قوسقان، ادال قىزمەتى مەن جانقيارلىق ەڭبەگى ارقىلى ەل قۇرمەتىنە بولەنگەن تۇلعا. ول بۇگىنگى ۇرپاققا ەرلىك پەن ادالدىقتىڭ، شىنايى ءپاتريوتيزمنىڭ ۇلگىسىن كورسەتكەن ازامات. لايىقتى وفيسەرلەردى تاربيەلەپ، قۇقىق قورعاۋ سالاسىنىڭ بەدەلىن ارتتىردى. گەنەرال قايداروۆ قاتارداعى پوليسەيلەردىڭ مۇددەسىن قورعاۋعا ەرەكشە كوڭىل ءبولدى. ارداگەرلەرگە قولداۋ كورسەتۋ جولىندا دا زور ەڭبەك ءسىڭىردى»، – دەپ اتاپ ءوتتى «گەنەرالدار كەڭەسى» رەسپۋبليكالىق قوعامدىق بىرلەستىگىنىڭ ءتوراعاسى بەكسۇلتان سارسەكوۆ.
ادىلەت گەنەرال-مايورى رۇستەم قايداروۆ – قازاق پوليسياسىنىڭ تاريحىندا ەرەكشە ورىن الاتىن كورنەكتى تۇلعا. ول كسرو ىشكى ىستەر مينيسترلىگىنىڭ ۇزدىك قىزمەتكەرلەرىنىڭ ءبىرى، قازاقستان رەسپۋبليكاسى ىشكى ىستەر مينيسترلىگىنىڭ قۇرمەتتى ارداگەرى، قۇقىقتانۋ جانە ەكولوگيا سالاسىنداعى تانىمال عالىم بولدى. رۇستەم ەسىمحان ۇلى رەسەي جاراتىلىستانۋ عىلىمدارى اكادەمياسىنىڭ تولىق كوررەسپوندەنت مۇشەسى، حالىقارالىق اقپاراتتاندىرۋ اكادەمياسىنىڭ اكادەميگى، حالىقارالىق ەكولوگيالىق پالاتانىڭ قۇرمەتتى پروفەسسورى اتاندى. 20-دان استام عىلىمي ماقالا مەن وقۋ قۇرالدارىنىڭ اۆتورى، قازاق كسر قىلمىستىق ءىس جۇرگىزۋ كودەكسىنىڭ اۆتورلارىنىڭ ءبىرى بولدى. ونىڭ ەڭبەگى تەك ەلىمىزدە عانا ەمەس، حالىقارالىق دەڭگەيدە دە جوعارى باعالاندى. بۇۇ-نىڭ ەسىرتكى بيزنەسىنە قارسى كۇرەس ماسەلەلەرى جونىندەگى كوميسسياسىنىڭ 39-سەسسياسىندا قازاقستان دەلەگاسياسىنىڭ قۇرامىندا جۇمىس ىستەپ، مينسك كونۆەنسياسىن ازىرلەۋ جونىندەگى دەلەگاسيانى باسقاردى. رۇستەم قايداروۆ رەسەي فەدەراسياسىنىڭ «پاراسات»، «دوستىق جۇلدىزى»، «ەرەن ەڭبەگى ءۇشىن» وردەندەرىمەن، سونداي-اق كسرو، قازاقستان، رەسەي، ۋكراينا جانە بەلارۋستىڭ 30-دان استام مەدالىمەن ماراپاتتالعان. 2019 جىلدىڭ 27 جەلتوقسانىندا الماتىدا بولعان ۇشاق اپاتىندا 14 ادام قازا تاپتى. سول قايعىلى وقيعادان ەل ءۇشىن ادال قىزمەت ەتكەن ادىلەت گەنەرال-مايورى رۇستەم قايداروۆ تا قازا بولدى. گەنەرال قايداروۆتىڭ ءومىر جولى مەن ەڭبەگى – ادالدىقتىڭ، ءپاتريوتيزمنىڭ جانە قايسارلىقتىڭ ايقىن ۇلگىسى. ونىڭ ەسىمى مەن ەڭبەكتەرى حالىق جادىندا ماڭگى ساقتالادى.