سەلدى توقتاتاتىن بوگەتتەر سالىنىپ جاتىر.
سۋ تاسقىنىنا قارسى ءىس-شارالاردىڭ جول كارتاسىن ىسكە اسىرۋ اياسىندا 2023 جىلعا دەيىن كىشى الماتى، تىكساي، ەسەنتاي وزەندەرىنىڭ ارناسىن رەكونسترۋكسيالاۋ جۇمىستارى اياقتالادى. بۇل تۋرالى يۋريي يلين ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
مينيستر كەلتىرگەن مالىمەتكە سايكەس، الماتى تاۋ بوكتەرىندە بارلىعى 50-دەن استام مۇزدىق كول بار. قالا حالقىن سەلدەن قورعاۋ ءۇشىن اقساي جانە ايۋساي شاتقالدارىندا سەلدى توقتاتاتىن بوگەتتەر سالىنىپ جاتىر.
ونىڭ ايتۋىنشا، بىلتىر ۇلكەن جانە كىشى الماتى، قارعالى جانە اقساي وزەندەرىنىڭ باسسەيندەرىندە 31 سەل ءقاۋپىن اۆتوماتتاندىرىلعان مونيتورينگىلەۋ ستانسياسى ورناتىلدى، بۇل ءقاۋىپتى ۋچاسكەلەردى ناقتى ۋاقىت رەجيمىندە قاشىقتان باقىلاۋعا مۇمكىندىك بەرەدى.
«سۋ تاسقىنىنا قارسى ءىس-شارالاردىڭ جول كارتاسىن ىسكە اسىرۋ شەڭبەرىندە 2023 جىلعا دەيىن كىشى الماتى، تىكساي، ەسەنتاي وزەندەرىنىڭ ارناسىن قايتا قالپىنا كەلتىرۋ جۇمىستارى اياقتالادى، جاربۇلاق وزەنى بويىنشا جۇمىستار جالعاسۋدا. اكىمدىك قالانىڭ ءار جەرىندەگى ارىق جەلىسىن رەكونسترۋكسيالاۋ جۇمىستارىن جۇرگىزۋدە. بۇل تۇرعىن ۇيلەردى سۋ باسۋ ءقاۋپىن ازايتۋعا مۇمكىندىك بەرەدى»، - دەپ اتاپ ءوتتى يۋريي يلين الماتى حالقىمەن كەزدەسۋ بارىسىندا.
سونىمەن قاتار، ول سەل جانە سىرعىما جاعدايىن باعالاۋ ءۇشىن "قازسەلقورعاۋ" بولىمشەلەرى الدىن الۋ ءىس-شارالارىن جۇرگىزەتىنىن تىلگە تيەك ەتتى.
«اتاپ ايتقاندا، جىل بويى باقىلاۋ جۇرگىزىلەدى، ماۋسىمدىق بەكەتتەر قويىلادى، جەرۇستى جانە اەروۆيزۋالدى تەكسەرۋلەر، سونداي-اق كوشكىن ۋچاسكەلەرىن نىعايتۋ جانە سەرپىندى ءقاۋىپتى كولدەردى بوساتۋ بويىنشا جۇمىستار جۇرگىزىلەدى. قابىلدانىپ جاتقان شارالار كوشكىن ءقاۋپى بار ۋچاسكەلەردىڭ سانىن 80-نەن 68-گە دەيىن ازايتۋعا مۇمكىندىك بەردى، ولاردىڭ 7-ەۋى ىلە الاتاۋى پاركىنىڭ اۋماعىندا ورنالاسقان»،- دەدى ول.