الماتىدا ۇرىلار ۇستالدى

الماتىنىڭ تۇركسىب اۋدانىندا ۇرلىق جاسادى دەگەن كۇدىككە ىلىنگەن ەكى ازامات ۇستالدى.

الدىن الا مالىمەت بويىنشا، بىرەر ساعاتتىڭ ىشىندە جىگىتتەر قالانىڭ ءار اۋدانىندا ەكى قىلمىس جاساعان، دەپ حابارلايدى Almaty-akshamy.kz Polisia.kz-كە سىلتەمە جاساپ. 

تۇنگى ۋاقىتتا قاسكويلەر ءوتىپ بارا جاتقان ادامعا شابۋىل جاسادى: ونىڭ باسىنان ۇرىپ، ءۇش تەلەفون مەن اقشا سالىنعان سومكەنى الىپ كەتتى. بىرنەشە ساعاتتان كەيىن كۇدىكتىلەر ءدال وسىنداي قىلمىستى قالانىڭ تومەنگى بولىگىندە جاسادى.

«جەدەل ىزدەستىرۋ ءىس-شارالارىن جۇرگىزۋ بارىسىندا ءبىزدىڭ بولىمشەنىڭ ۋچاسكەلىك ينسپەكتورلارى باعداردان الىنعان بەلگىلەر بويىنشا كۇدىكتىلەردى ۇستادى. ولار – 1993 جىلى تۋعان ا.ەسىمدى ازامات جانە 1990 جىلعى ك.ەسىمدى ازامات. ولاردىڭ ءبىرى استانا قالاسىندا بوتەننىڭ مۇلكىن ۇرلاعانى ءۇشىن ىزدەۋدە بولعان. اتالعان دەرەكتەر بويىنشا ق ر قك-نىڭ 188-بابى 3-بولىگىنە سايكەس، قىلمىستىق ءىس تىركەلدى. ۇرلانعان زاتتار: تەلەفوندار، قول ساعاتتار جانە اقشا ايعاق رەتىندە قىلمىستىق ىسكە قوسىلدى»، – دەيدى تۇركسىب اۋداندىق پوليسيا باسقارماسىنىڭ باستىعى ەركىن امانتايەۆ.

قىلمىستىق ءىس بويىنشا باسقا دا مالىمەتتەر ق ر قپك-نىڭ 201-بابى جانە ق ر كونستيتۋسياسىنىڭ نورمالارىنا سايكەس جاريا ەتۋگە جاتپايدى.