قالا كۇنى قارساڭىندا الاتاۋدىڭ ەتەگىندەگى «بورالداي ساق قورعاندارى» ارحەولوگيالىق پاركىندە جىل سايىنعى «ۇلى دالا – كوشپەندىلەر الەمى» حالىقارالىق ەتنوفەستيۆالى ءوتتى، دەپ حابارلايدى almaty-akshamy.kz.
كيىز ۇيلەر تىگىلىپ، التىباقاندار قۇرىلدى، كوشپەندىلەردىڭ جاۋىنگەرلىك ويىندارى كورسەتىلدى.
– اراعا 4 جىل سالىپ، فەستيۆال قايتا جانداندى. ءىس-شاراعا 12 مەملەكەت قاتىسىپ جاتىر. العاشقى قاتىسۋشىلاردىڭ ءبىرى بولىپ مالايزيا مەملەكەتى ءوتىنىش بەردى. مەرەكەلىك ءىس-شاراعا كەلۋشىلەردىڭ سانى ءوسىپ جاتىر. فەستيۆالدى 10 مىڭعا جۋىق ادام تاماشالادى. كيىز ۇيلەر سانى ءۇش ەسە ارتتى، 40-قا جۋىق مەيرامحانا تۇرعىندارعا قىزمەت كورسەتىپ جاتىر. ارنايى قويىلىمدارمەن شەكتەلىپ قالمادىق. ات ۇيرەتۋ، ساداق اتۋ سياقتى ويىندار ۇيىمداستىرىلىپ، شەتەلدەن كەلگەن ونەرپازدار دا ونەرلەرىن كورسەتتى. بۇل حالىقتى ءتانتى قىلىپ جاتىر. 500-گە جۋىق ونەرپاز ءوز ونەرلەرىن كورسەتتى. الماتى قالاسىنىڭ تۇرعىندارىنا، قالا مەيماندارىنا العىس بىلدىرەمىن. قالا باسشىسىنىڭ قولداۋىمەن وتكەن ءىس-شارا قىزىقتى ءوتىپ جاتىر،- دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.
ۇلتتىق ونەر كورمەلەرى ۇيىمداستىرىلدى. «تۇران»، «حاسساك» ەتنو-فولكلورلىق انسامبلدەرى، تۇركيادان، مونعوليادان، التاي مەن تىۆادان، چۋۆاشيا مەن قىرعىزستاننان جانە باسقا ەلدەردەن كەلگەن تانىمال ارتيستەر ءوز ونەرلەرىن كورسەتتى.
– قازاق ءبىر تۋعاندارىمىزعا العىس بىلدىرگىمىز كەلەدى. فەستيۆالگە ءبىرىنشى رەت قاتىسىپ جاتىرمىز. قىرعىز ەلىنەن 30-دان استام ادام كەلدى. ءبىز ساداق اتۋ سايسىندا ب ا ق سىناستىق. قىزدارىمىز سيرك پەن ساداق اتۋدان ءوز ونەرلەرىن كورسەتتى. الماتىدا بۇنداي شارا جىل سايىن ۇيىمداستىرىلىپ جاتىر. بۇل دەگەنىمىز ۇلتتىق سپورتتىڭ دامۋىنا سەرپىن بەرەرى ءسوزسىز. الماتىنىڭ اۋا رايى ءبىزدىڭ ەلگە ۇقساس ەكەن. ماعان بۇل شارا قاتتى ۇنادى، – دەدى ساداق اتۋدان جاتتىقتىرۋشى اسلايىم اشىروۆا.
نيەت بىلدىرۋشىلەردىڭ بارلىعى ءتۇرلى جارىستار مەن ۆيكتورينالارعا قاتىسىپ، باعالى سىيلىقتار جانە ۇستالىق، زەرگەرلىك ونەردىڭ قۇپياسىنا بويلاپ، ۇلتتىق اس مازىرىنەن ءدارىس الدى.