الماتىدا ۇلەسكەرلەردىڭ اقشاسىن يەمدەنگەن الاياق سوتتالدى

ناۋرىزباي اۋدانىنىڭ پروكۋراتۋراسى ۇلەسكەرلەردىڭ قاراجاتىن تارتۋ جونىندە زاڭسىز قىزمەتكە بايلانىستى الاياقتىقتىڭ جولىن كەستى.

بۇل تۋرالى الماتى قالاسىنىڭ پروكۋراتۋراسى مالىمدەدى. 

2022 جىلى «Flora City Stroy» ج ش س ديرەكتورى «ك» ازاماتى «instagram»، «krisha.kz» الەۋمەتتىك جەلىلەرىندە قۇرىلىس سالۋعا رۇقسات قاعازىنسىز «Lantana» جانە «Flora» تك قۇرىلىسىنىڭ باستالۋى تۋرالى جارناما بەرگەن، دەپ حابارلايدى almaty-akshamy.kz.

ودان كەيىن «ك» ازاماتى، ساتىپ الۋشىلاردى الداۋ جانە ولاردىڭ سەنىمىن تەرىس پايدالانۋ جولىمەن الدىن-الا ساتىپ الۋ-ساتۋ شارتتارىن جاساپ، 290 ملن تەڭگە مولشەرىندەگى 34 ۇلەسكەردىڭ  اقشاسىن يەلەنگەن.

ماتەريالدار سوتقا دەيىنگى تەرگەپ-تەكسەرۋ جۇرگىزۋ ءۇشىن بوستاندىق اۋدانىنىڭ پوليسيا باسقارماسىنا جولداندى.

بوستاندىق اۋداندىق سوتىنىڭ 21.06.2024 جىلعى ۇكىمىمەن «ك» ازاماتى ق ر قك-نىڭ 190-بابى 4-بولىگى 2-تارماعىمەن (اسا ءىرى مولشەردەگى الاياقتىق) كىنالى دەپ تانىلىپ، 6 جىل 8 اي مەرزىمگە باس بوستاندىعىنان ايىرىلدى.

الىنعان ۋچاسكەلەر جابىرلەنۋشىلەردىڭ زالالىن وتەۋ ءۇشىن ساتىلاتىن بولادى.

ۇكىم زاڭدى كۇشىنە ەنگەن جوق.

الماتى قالاسىنىڭ پروكۋراتۋراسى ازاماتتاردى جىلجىمايتىن مۇلىكتى ساتىپ الۋ كەزىندە قىراعى بولۋعا جانە رۇقسات بەرۋ، سونداي-اق قۇقىق بەلگىلەيتىن قۇجاتتاردىڭ بولۋىن تەكسەرۋگە شاقىرادى.