الماتىداعى «Mega Towers» تۇرعىن ءۇي كەشەنىندە 25-قاباتقا دەيىن بار جىلدامدىقپەن كوتەرىلىپ بارىپ، ءۇيدىڭ توبەسىنە سوعىلعان ءليفتىنى تەكسەرۋ قورىتىندىسى بەلگىلى بولدى.
قازاقستان ليفتىشىلەر ۇلتتىق قاۋىمداستىعىنىڭ ساراپشىلارى مەن الماتى قالاسىنىڭ دامۋ جانە كوممۋنالدىق ينفراقۇرىلىم باسقارماسىنىڭ قىزمەتكەرلەرى بىرلەسىپ ليفتىگە تەحنيكالىق تەكسەرۋ جۇرگىزدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«تەحنيكالىق تەكسەرۋ ناتيجەلەرى بويىنشا ليفت كابيناسىنىڭ توقتاي الماي قالۋى تەجەۋ مەحانيزمىنىڭ اقاۋى سالدارىنان بولعانى انىقتالدى. سونداي-اق، ماشينا ءۇي-جايىن تەكسەرۋ كەزىندە اۋا تەمپەراتۋراسى بارلىق رۇقسات ەتىلگەن نورمالاردان اسىپ، +45° كورسەتكەن. بۇل ليفت جابدىقتارىن ءقاۋىپسىز پايدالانۋعا تەرىس اسەر ەتەدى»، - دەدى قازاقستان ليفتشىلەر ۇلتتىق قاۋىمداستىعىنىڭ پرەزيدەنتى ەرجان يگىبايەۆ.
تەكسەرۋ قورىتىندىسى بويىنشا ليفتىگە قىزمەت كورسەتەتىن «ل.» كومپانياسىنىڭ ليفتىگە قىزمەت كورسەتۋ جۇمىستارىن جۇرگىزۋ قۇقىعىنا ونەركاسىپتىك قاۋىپسىزدىك كوميتەتى بەرەتىن اتتەستاتى مەن ست-رك 3305-2018 ليفتىلەرى بويىنشا ۇلتتىق ستاندارتقا سايكەستىگى تۋرالى كۋالىگى بولماعانى انىقتالدى.
«بۇل سەرۆيستىك كومپانيانىڭ قىزمەتتىڭ وسى تۇرىمەن اينالىسۋعا، قىزمەت كورسەتۋگە شارت جاساسۋعا قۇقىعى جوق ەكەنىن بىلدىرەدى»، - دەپ ءتۇسىندىردى سپيكەر.
قاۋىمداستىق باسشىسى اتالعان جشس-نىڭ الماتىنىڭ تاعى بىرنەشە ەليتالىق تۇرعىن ءۇي كەشەنىنىڭ ليفتىلەرىن كۇتىپ ۇستاۋدى قامتاماسىز ەتەتىنىنە الاڭداۋشىلىق ءبىلدىردى. ونىڭ ايتۋىنشا، تەكسەرۋ ناتيجەلەرى بويىنشا ۋاكىلەتتى ورگاندار اكىمشىلىك جازالاۋ شارالارىن قابىلدايدى. كومپانيا باسشىلىعى جاۋاپقا تارتىلۋى مۇمكىن.
«ل.» كومپانياسى ەندى ليفتىلەرگە قىزمەت كورسەتۋ جۇمىستارىن جۇرگىزۋ قۇقىعىنا اتتەستات پەن ۇلتتىق ستاندارتقا سايكەستىگى تۋرالى كۋالىك الۋى ءتيىس. تەك سودان كەيىن عانا ليفتىلەرگە قىزمەت كورسەتۋى ءتيىس. وسىلايشا، كومپانيا زاڭنامادا كورسەتىلگەن تالاپتاردى ورىندايدى»، - دەدى ەرجان يگىبايەۆ.
سونىمەن قاتار، سپيكەر الماتىدا ليفتىلەرگە قىزمەت كورسەتەتىن 60-قا جۋىق كومپانيا بار ەكەنىن اتاپ ءوتتى. الايدا، ولاردى تەكسەرۋدە ءقازىر قيىندىقتار بار. سەبەبى، 2023 جىلعا دەيىن ەلدە شاعىن جانە ورتا بيزنەستى تەكسەرۋگە موراتوريي قابىلدانعان. ول پيك، ميب، جس ءتوراعالارى ليفتىلەرگە قىزمەت كورسەتەتىن كومپانيالارمەن شارت جاساسپاس بۇرىن، ولاردا اتتەستاتتىڭ بولۋى جانە بارلىق تالاپتاردىڭ سايكەستىگى تۇرعىسىنان تەكسەرۋى ءتيىس دەپ ەسەپتەيدى.
«مەنىڭ ويىمشا، ليفت — ءقاۋىپتى تەحنيكالىق قۇرىلعى. بۇل جەردە ءبىرىنشى ورىندا قىزمەت كورسەتەتىن كومپانيانىڭ كاسىبيلىگى جانە ونىڭ ءتيىستى بىلىكتى پەرسونالى تۇرۋى ءتيىس»، - دەپ مالىمدەدى يگىبايەۆ.
ەسكە سالايىق، الماتىدا «Mega Towers» تۇرعىن ءۇي كەشەنىندەگى ليفت 25-قاباتقا دەيىن بار جىلدامدىقپەن كوتەرىلىپ، ءۇيدىڭ توبەسىنە سوعىلعان بولاتىن . سالدارىنان جاس جىگىت زارداپ شەككەن ەدى.