قالادا ءۇي جانۋارلارىن ۇستاۋ جانە سەرۋەندەتۋ قاعيدالارى بەكىتىلدى.
ءۇي جانۋارلارىن سەرۋەندەتۋدىڭ جاڭا ەرەجەلەرى، سونداي-اق جانۋارلاردى اۋلاۋ، ۋاقىتشا ۇستاۋ جانە جانۋارلاردى ءولتىرۋدىڭ جاڭا ەرەجەلەرى تۋرالى وكق-نىڭ بريفينگىندە الماتى قالالىق كاسىپكەرلىك جانە ينۆەستيسيالار باسقارماسىنىڭ باسشىسى بەرىك سولتانبايەۆ ايتتى، دەپ حابارلايدى Almaty-akshamy.kz
ەسكە سالا كەتەيىك، 2021 جىلعى 30 جەلتوقساندا مەملەكەت باسشىسى ق ر «جانۋارلارعا جاۋاپكەرشىلىكپەن قاراۋ تۋرالى» زاڭىن قابىلداعان بولاتىن. ول جانۋارلاردى قورعاۋ، ولاردىڭ قاۋىپسىزدىگىن قامتاماسىز ەتۋ، جانۋارلارعا قاراۋدا ادامگەرشىلىكتى نىعايتۋ جانە جانۋارلارمەن قارىم-قاتىناس جاساۋ كەزىندە قوعامنىڭ ادامگەرشىلىك قاعيداتتارىن ساقتاۋ، سونداي-اق جانۋارلاردى ۇستاۋ كەزىندە جەكە جانە زاڭدى تۇلعالاردىڭ قۇقىقتارى مەن زاڭدى مۇددەلەرىن قورعاۋدى رەتتەيدى.
ونىڭ نەگىزىندە ەكولوگيا جانە تابيعي رەسۋرستار مينيسترلىگى جانۋارلاردى ۇستاۋدىڭ، ۋاقىتشا ۇستاۋدىڭ جانە ءولتىرۋدىڭ ۇلگىلىك قاعيدالارىن جانە ءۇي جانۋارلارىن ۇستاۋ مەن سەرۋەندەتۋدىڭ ۇلگىلىك ەرەجەلەرىن ازىرلەپ، قابىلدادى. سونىمەن قاتار، 2023 جىلعى 17 قاڭتارداعى الماتى قالاسى ءماسليحاتىنىڭ كەزەكتەن تىس ءحححىى سەسسياسىندا جانۋارلاردى ۇستاۋ، ۋاقىتشا ۇستاۋ جانە ءولتىرۋ قاعيدالارى، سونداي-اق الماتى قالاسىندا ءۇي جانۋارلارىن ۇستاۋ جانە سەرۋەندەتۋ قاعيدالارى بەكىتىلدى. (08.02.2023 باستاپ قولدانىسقا ەنگىزىلەدى)
«جاڭا ەرەجەلەر جانۋارلارعا قاتىگەزدىك كورسەتۋدىڭ الدىن الۋعا، ولاردىڭ سانىن ادامگەرشىلىكپەن رەتتەۋگە، قالانىڭ ۆەتەرينارلىق-سانيتارلىق قاۋىپسىزدىگىن قامتاماسىز ەتۋگە، سونداي-اق ءۇي جانۋارلارىن ۇستاۋ جانە سەرۋەندەتۋ ءتارتىبىن رەتتەۋگە باعىتتالعان. وندا «اۋلاۋ-زارارسىزداندىرۋ-ۆاكسيناسيا-قايتارۋ» (ازۆق) باعدارلاماسى ارقىلى ولاردىڭ سانىن گۋمانيستىك جولمەن رەتتەۋ، ۇستاۋ تارتىبىنە قويىلاتىن تالاپتارد قاراستىرىلعان»، - دەدى بەرىك سولتانبايەۆ.
بايانداماشى 2022 جىلدىڭ ناۋرىز ايىنا دەيىن ۇستالعان جانۋارلاردىڭ يەلەرى تابىلىپ، اسىراپ الۋ كەلىسىمدەرى بويىنشا ءۇشىنشى تۇلعالارعا بەرىلگەنگە دەيىن 3 كۇن ۇستالعانىن، ال سۇراۋى جوق جانۋارلار مەديكامەنتوزدى ۇيىقتاتۋعا ۇشىراعانىن ەسكە سالدى.
ەندى بەلگىلى ءبىر جاعدايلاردى قوسپاعاندا (ەگەر جانۋار ادامعا، جانۋارلارعا شابۋىل جاساسا نەمەسە ادام ءومىرى مەن دەنساۋلىعىنا ءقاۋىپ توندىرسە؛ كەم دەگەندە ءۇش جانۋار توپتاسقان بولسا) ەمدەلمەيتىن اۋرۋمەن اۋىراتىن جانۋارلار ادامگەرشىلىك تۇرعىسىنان ق ر زاڭناماسىندا تىيىم سالىنباعان پرەپاراتتارمەن، (ەۆتانازيا) ءدارى ارقىلى ولتىرىلەدى) قاڭعىباس جانۋارلاردىڭ سانىن كەز كەلگەن تاسىلمەن رەتتەۋگە تىيىم سالىنادى.
وسىعان وراي، قالالىق ۆەتەرينارلىق قىزمەت اۋلاۋ قىزمەتىن جاڭارتتى: ۋاقىتشا ۇستاۋ پۋنكتى حيرۋرگيالىق قۇرال-جابدىقتارمەن جانە ۆەتەرينارلىق پرەپاراتتارمەن جابدىقتالعان: ۇستاۋ-زارارسىزداندىرۋ-ۆاكسيناسيا-بوساتۋ (ۇزۆب) جانە وپەراسيادان كەيىنگى كۇتىم. سونداي-اق 200 ورىندىق قورشاۋلارى بار مودۋلدىك بلوكتار ورناتىلدى.
ۋاقىتشا ۇستاۋ پۋنكتىندە جانۋارلاردى تىركەۋدەن، تەكسەرۋدەن، يەسىن انىقتاۋعا ارنالعان ءچيپتىڭ بار-جوعىن سكانەردەن وتكىزگەننەن كەيىن جانۋارلاردىڭ سۋرەتتەرى Instagram جەلىسىندەگى @aulau_kyzmeti رەسمي پاراقشاسىندا جاريالانادى.
سۇراۋى جوق جانۋارلار جۇقپالى اۋرۋلارعا دياگنوستيكالىق سىناقتار مەن اگرەسسيالىق سىناقتاردان كەيىن ۇزۆب پروسەدۋراسىنان ءوتىپ، بيركالار تاعىلىپ، بۇرىنعى مەكەندەۋ ورىندارىنا جىبەرىلەدى.
قالا تۇرعىندارى وسى جاسىل بيركالارعا قاراپ، جانۋاردىڭ اگرەسسيۆتى ەمەس جانە اينالاسىنداعىلارعا ءقاۋىپ توندىرمەيتىنىن تۇسىنەدى.
انىقتاما ءۇشىن: بۇگىندە ۇزۆب باعدارلاماسى ىسكە قوسىلعاننان كەيىن بۇرىنعى اۋلانعان جەرلەرگە ەرىكتىلەر مەن جانۋارلاردى قورعاۋ ۇيىمدارىنىڭ («اميگو» قق، «Senim-Meirim»، «ايانىش» قق، «Animal Security» قق) باقىلاۋىمەن 134 يت پەن ءبىر مىسىق شىعارىلدى.
«بيىل قاڭعىباس مىسىقتارعا ارنالعان ۇيلەر ورناتۋ بويىنشا پيلوتتىق جوبانى ىسكە قوسۋ جوسپارلانۋدا. بۇل جوبانىڭ ماقساتى قاجەتتى مالىمەتتەردى الۋ جانە ۇزۆب باعدارلاماسىنان وتكەن قاڭعىباس يتتەر ءۇشىن پيتومنيكتەردى ورناتۋداعى ىقتيمال قيىندىقتاردى انىقتاۋ بولىپ تابىلادى. ءۇيسىز جانۋارلاردى قورعاۋ الەۋمەتتىك ماڭىزى بار ماسەلە ەكەنىن تۇسىنەمىز جانە بۇل ماسەلەنى شەشۋگە ءاربىر ادام قاتىسا الادى. قولعا العان جانۋارلار ءۇشىن ءبىز جاۋاپتىمىز»، - دەدى ب.سولتانبايەۆ.
الماتى قالاسىندا ءۇي جانۋارلارىن ۇستاۋ جانە سەرۋەندەتۋ ءتارتىبى ءۇي جانۋارلارىنىڭ يەلەرى مەن جاۋاپتى تۇلعالاردىڭ جاۋاپكەرشىلىگىن رەتتەيتىن جاڭا ەرەجەمەن ايقىندالادى.
جاڭا ەرەجەدە «جاۋاپتى ادام» - جانۋار يەسىنىڭ جازباشا نۇسقاۋى بويىنشا جانۋار يەسىنىڭ قۇقىقتارى مەن مىندەتتەرىن اتقاراتىن ادام سياقتى ۇعىم ەنگىزىلدى.
وسى ەرەجەدەگى جاڭاشىلدىق، ءۇي جانۋارلارىن قاراۋسىز قالدىرۋعا بولمايدى. مۇنداي جاعداي تۋىنداعان جاعدايدا ءۇي جانۋارىنىڭ يەسى نەمەسە جاۋاپتى ادام جانۋاردى ۋاقىتشا ۇستاۋعا ءۇي جانۋارلارىنا ارنالعان پاناحاناعا ورنالاستىرادى نەمەسە ءۇشىنشى تۇلعالارعا ۋاقىتشا ۇستاۋعا بەرەدى، نە جانۋاردى زوولوگيالىق قوناقۇيگە ورنالاستىرادى.
جاراقات پەن زيان كەلتىرمەۋ ءۇشىن يت يەلەرى جانۋارلارىن جاڭا ەرەجەنىڭ تالاپتارىنا سايكەس سەرۋەندەتۋلەرى كەرەك.
سونداي-اق، يتتەرمەن كۇزەتىلەتىن تەحنيكالىق قىزمەت كورسەتۋ ستانسيالارى، اۆتوتۇراقتار، قويمالار سياقتى ءوندىرىس ورىندارى بار مەنشىك يەلەرى مەن جاۋاپتى تۇلعالار جانۋارلاردى تەك تۇنگى ۋاقىتتا جانە قورشالعان اۋماقتا بوس ۇستاۋعا مىندەتتى. كۇندىزگى ۋاقىتتا يتتەردى قورادا نەمەسە قارعىباۋمەن ۇستاۋ كەرەك.
قازاقستان رەسپۋبليكاسىنىڭ جانۋارلارعا جاۋاپكەرشىلىكپەن قاراۋ سالاسىنداعى بەلگىلەنگەن زاڭناماسىن بۇزعانى ءۇشىن جاۋاپكەرشىلىك قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 407-2-بابىمەن رەتتەلەدى. سونداي-اق بەلگىلى ءبىر قۇقىق بۇزۋشىلىق ءۇشىن اكىمشىلىك ايىپپۇلدار سالۋدى قاراستىرادى جانە ولاردىڭ مولشەرى دە قۇقىق بۇزۋشىلىقتىڭ اۋىرلىعىنا بايلانىستى (10-نان 40 اەك-كە دەيىن). ءبىر سوزبەن ايتقاندا، 1 اەك - 3450 تەڭگە.
جاڭا ەرەجەلەر مۇمكىندىگى شەكتەۋلى (كورۋ قابىلەتى ناشار) جانداردىڭ جولسەرىك يتتەردى ۇستاۋىن دا نازارعا العان، ولار ساۋدا ورىندارىندا، وندىرىستىك زالداردا جانە ءۇي-جايلاردا يەلەرىمەن جۇرۋلەرىنە كەدەرگى جوق.
«اكىمشىلىك ايىپپۇلدار بوس جۇرگەن يتتەر تىستەگەن ادامداردىڭ دەنساۋلىعىن وتەي المايتىنىن ءارقايسىمىز جاقسى تۇسىنەمىز. سوندىقتان، ءۇي جانۋارلارى بار قالا تۇرعىندارىنىڭ ەسىنە سالعىم كەلەدى – «سىزدەر ولار ءۇشىن جاۋاپتىسىزدار، سوندىقتان ءۇي جانۋارلارىڭىزدىڭ تاۋلىكتىڭ كەز كەلگەن ۋاقىتىندا باسقالار ءۇشىن ءقاۋىپسىز بولۋى ءۇشىن بارلىق قاجەتتى شارالاردى قابىلداۋىڭىز كەرەك»، - دەپ تۇيىندەدى ب. سولتانبايەۆ.