الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا «ۇلتتىق تۇتىنۋشىلار ليگاسى» رەسپۋبليكالىق قوعامدىق بىرلەستىگىنىڭ پرەزيدەنتى سۆەتلانا رومانوۆسكايانىڭ قاتىسۋىمەن بريفينگ ءوتتى.
2022 جانە 2023 جىلدار ارالىعىندا بىرلەستىككە كەڭەس الۋ ءۇشىن 4000-نان استام ازاماتتىڭ جۇگىنگەندىگى بەلگىلى بولدى، دەپ حابارلايدى Almaty-akshamy.kz.
كوپ جاعدايدا ازاماتتار ساۋدا، دەنساۋلىق ساقتاۋ، تاماقتانۋ، تۇرعىن ۇي-كوممۋنالدىق شارۋاشىلىق، بايلانىس سالالارىنداعى قىزمەتتەردىڭ ساپاسىنا قاناعاتتانبايدى.
«تۇتىنۋشىلار ليگاسىنىڭ نەگىزگى ماقساتى – سانالى تاڭداۋ جاسايتىن ادامنىڭ بەلسەندى ازاماتتىق ۇستانىمىن قالىپتاستىرۋ»، - دەپ اتاپ ءوتتى س.رومانوۆسكايا.
ول ازاماتتاردىڭ شاعىمدانۋىنىڭ نەگىزگى سەبەپتەرى رەتىندە ساپاسىز تاۋارلاردىڭ ساتىلۋى، تاۋارلارداعى باعا بەلگىلەرىنىڭ بولماۋى جانە دۇرىس ەمەستىگى، ينتەرنەت-دۇكەندەردەن اقشانى ۋاقتىلى قايتارىلماۋى ەكەنىن اتاپ ءوتتى.
تۇتىنۋشىلاردىڭ شاعىمدارى كەلەسى سالالارعا باعىتتالعان:
* ساپاسىز تاۋارلاردى / تەحنيكانى ساتۋ - 32،6%؛
* بەلگىلەنگەن مەرزىمدە قىزمەت كورسەتۋ/جۇمىستاردى ورىنداۋ شارتىن ورىنداماۋ-12،2%؛
* ابونەنتتىك بايلانىس قىزمەتتەرىنە-7،3%؛
* ءبىلىم بەرۋ كۋرستارىنا-7،3%؛
* اۋە قىزمەتتەرىنە-2%؛
* تۇتىنۋشىلىق داۋلاردى قاراۋدىڭ سوتقا دەيىنگى ءتارتىبىن بۇزۋ-4%؛
* ساتۋشىنىڭ ايىرباستاۋ/قايتارۋ مىندەتىن ورىنداماۋى-15،5%؛
* ەلەكتروندىق ساۋدا سالاسىنداعى بۇزۋشىلىقتار-14،7%.
سۆەتلانا رومانوۆسكايا حالىقتىڭ ءومىر ءسۇرۋ ساپاسىن جاقسارتاتىن قولدانىستاعى ۇلتتىق ستاندارتتاردى جەتىلدىرۋ بويىنشا جۇمىس جۇرگىزۋ قاجەتتىگىن اتاپ ءوتتى.