العان تاۋار ساپاسىنا نارازى بولىپ، شاعىمدانعاندار سانى وسكەن.
قازاقستاندىقتاردىڭ قۇقىقتىق ساۋاتتىلىعى مەن تۇتىنۋشىلىق مادەنيەتى ايتارلىقتاي ءوسىپ كەلەدى، دەپ حابارلادى Almaty-akshamy.kz Kapital.kz سىلتەمە جاساپ.
الماتى قالاسى تۇتىنۋشىلاردىڭ قۇقىقتارىن قورعاۋ دەپارتامەنتىنىڭ ديرەكتورى نۇرلىبەك بيمۋرزايەۆتىڭ ايتۋىنشا، وتكەن جىلمەن سالىستىرعاندا تۇتىنۋشىلار تاراپىنان تۇسكەن شاعىم كولەمى ايتارلىقتاي وسكەن.
«شاعىم جازاتىن ازاماتتاردىڭ باسىم بولىگىنە تاۋاردىڭ ساپاسى مەن كورسەتىلگەن قىزمەت ساپاسى ۇنامايدى. جالپى رەسپۋبليكا بويىنشا 2022 جىلدىڭ ءبىرىنشى جارتىجىلدىقتا 11595 ءوتىنىش كەلىپ تۇسكەن. بۇل 2021 جىلدىڭ سايكەس كەزەڭىمەن سالىستىرعاندا 42%-عا كوپ (8 164 رەت قارالدى). ايىنا تۇتىنۋشىلاردىڭ وتىنىشتەرى ايماققا بايلانىستى 20-35 پايىزعا ارتىپ كەلەدى. الماتى قالاسى بويىنشا دەپارتامەنت 6 ايدا 1470 ءوتىنىشتى قارادى، ونىڭ 766-سى جازباشا، 87ء-سى تەلەگرام بوتى ارقىلى، 638ء-ى e-otynysh ونلاين ۇندەۋ جۇيەسى ارقىلى»، - دەيدى نۇرلىبەك بيمۋرزايەۆ.
تۇتىنۋشىلاردىڭ قۇقىقتارىن قورعاۋ كوميتەتىنىڭ مالىمەتىنشە، وتىنىشتەردى قاراۋ قورىتىندىسى بويىنشا ۇستىمىزدەگى جىلدىڭ التى ايىندا قازاقستاندىقتارعا ساپاسىز تاۋارلار مەن قىزمەتتەر ءۇشىن 408 ملن تەڭگە قايتارىلعان. ونىڭ تورتتەن بىرىنەن استامى – 104 ميلليون تەڭگە دەرلىك – الماتىنىڭ ۇلەسىنە جاتادى.
تۇتىنۋشىلاردىڭ قۇقىقتارىن قورعاۋ دەپارتامەنتىنىڭ ماماندارى قازىرگى كەزدە مەملەكەتتىك ورگانداردىڭ شاعىن كاسىپكەرلىك سۋبەكتىلەرىن تەكسەرۋىنە موراتوريي جاريالانعانىن ەسكە سالدى. سوندىقتان جوسىقسىز كاسىپكەرلەردىڭ ارەكەتىنە جاۋاپ بەرۋ شارالارى ولاردىڭ ارەكەتىنەن زارداپ شەككەن جەكە تۇلعانىڭ وتىنىشىنەن كەيىن عانا قابىلدانۋى مۇمكىن. ازاماتتاردىڭ وتىنىشتەرىن جەدەل قاراۋ ءۇشىن ارنايى پلاتفورمادا ونلاين رەجيمىندە شاعىم تۇسىرۋگە بولادى.
«تۇتىنۋشىلاردىڭ قۇقىقتارىن قورعاۋ تۋرالى» زاڭعا ازىرلەنگەن تۇزەتۋلەردىڭ 2ء-شى پاكەتى تۇتىنۋشىلىق قۇقىقتاردى قورعاۋ جۇيەسىندەگى قۇقىقتىق ولقىلىقتاردى جويۋعا، حالىقتىڭ قۇقىقتىق ساۋاتتىلىعىن ارتتىرۋعا، سونداي-اق تاۋارلار مەن قىزمەتتەر ساپاسىنىڭ وسۋىنە ىقپال ەتەتىن بولادى. زاڭ جوباسىن تالقىلاۋعا بارلىعى اشىق نقا پورتالىندا قاتىسا الادى.
تۇتىنۋ قۇقىعىن بۇزۋ تۋرالى شاعىمدى «E-tutynushy» ونلاين-سەرۆيسىنىڭ كومەگىمەن بەرۋگە بولادى. كوميتەت ماماندارىنىڭ كونسۋلتاسياسى تەگىن «جەدەل جەلى» تەلەفوندارى ارقىلى جۇزەگە اسىرىلادى: 8-7172-74-98-32، 8-7172-74-98-36.
قازاقستان ۇكىمەتى قازاقستاندىقتاردىڭ تۇتىنۋ قۇقىعىن قورعاۋ ماقساتىندا ستۋدەنتتەر اراسىندا تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا كۋرستار وتكىزىپ جاتىر.
كۋرستار قازاقستان رەسپۋبليكاسى ساۋدا جانە ينتەگراسيا مينيسترلىگى تۇتىنۋشىلاردىڭ قۇقىقتارىن قورعاۋ كوميتەتىنىڭ قولداۋىمەن، «وقىتۋ قىزمەتتەرىن كورسەتۋ ارقىلى تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا حالىقتىڭ اقپاراتتىق-اعارتۋ جۇمىسى» الەۋمەتتىك جوباسى اياسىندا وتكىزىلۋدە.
بۇل كۋرس ستۋدەنتتەردىڭ كەلەسى ماقساتتارىنا قول جەتكىزۋگە قىزمەت ەتەدى: تۇتىنۋشىلاردىڭ قۇقىقتارىن قورعاۋ سالاسىنداعى قاتىناستاردى رەتتەيتىن نورماتيۆتىك قۇقىقتىق اكتىلەرمەن جۇمىس ىستەۋ داعدىلارىن جەتىلدىرۋ، تۇتىنۋشىلاردىڭ قۇقىقتارىن قورعاۋ تۋرالى زاڭنامانى قولدانۋ پراكتيكاسىن زەردەلەۋ، زاڭدى ساناتتاردى تۇجىرىمداۋ جانە اجىراتۋ، ودان ءارى زاڭ شىعارۋ جۇمىسى ءۇشىن زاڭداردى دۇرىس قولدانۋ داعدىلارىن دامىتۋ.
شىعىس قازاقستان وبلىسىندا 2022 جىلدىڭ 7 قاراشاسى مەن 15 قاراشاسى ارالىعىندا سارسەن امانجولوۆ اتىنداعى شىعىس قازاقستان ۋنيۆەرسيتەتىندە كۋرس ۇيىمداستىرىلۋدا. اۆتورى، كۋرس وقىتۋشىسى/ترەنەرى: زاڭ عىلىمدارىنىڭ كانديداتى رامازانوۆا اينۋر سەرىكحان قىزى.
باتىس قازاقستان وبلىسىندا 2022 جىلدىڭ 7 قاراشاسى مەن 15 قاراشاسى ارالىعىندا «تۇتىنۋشىلاردىڭ قۇقىقتارىن قورعاۋ» كۋرسىن باتىس قازاقستان يننوۆاسيالىق-تەحنولوگيالىق ۋنيۆەرسيتەتىنىڭ ستۋدەنتتەرى وقىپ باستادى. كۋرستى تاجىريبەلى مامان، «باتىس قازاقستان وبلىستىق تۇتىنۋشىلاردىڭ قۇقىعىن قورعاۋ بويىنشا قوعام» قوعامدىق بىرلەستىگىنىڭ ءتورايىمى تەلاگيسوۆا دارينا شاۋمۇرات قىزى جۇرگىزەدى.
الماتى مەنەدجمەنت ۋنيۆەرسيتەتىندە ءوتىلىپ جاتقان «تۇتىنۋشىلاردىڭ قۇقىقتارىن قورعاۋ» كۋرسى اياقتالۋ كەزەڭىنە جەتتى. ستۋدەنتتەر اتالعان كۋرس بويىنشا ەمتيحان تاپسىردى.