IV حالىقارالىق تۇركىتىلدەس جۋرناليستەر مەديا فورۋمىنىڭ تاقىرىبى – «TURKTIME: تۇركى ەلدەرىنىڭ مەديا جانە تۋريزم بىرلىگى». فورۋمعا ەلىمىزدىڭ ءار ايماعىنان كەلگەن ب ا ق وكىلدەرى جانە تۇركيا، وزبەكستان، گەرمانيا، ۇلىبريتانيادان ۇزدىك سپيكەرلەر قاتىسىپ، بۇگىنگى مەديا كەڭىستىكتەگى وزەكتى ماسەلەلەردى تالقىلاۋدا.
سونداي-اق، ورتالىق ازيانىڭ ب ا ق باسشىلارى، جۋرناليستەر، اقپارات جانە تۋريزم سالاسىنا قاتىستى مەملەكەتتىك ورگاندار، دەپۋتاتتار، PR مەنەدجەرلەرى، مەديا سالاسىنداعى ۇكىمەتتىك ەمەس ۇيىم وكىلدەرى، تۋريزم سالاسىنىڭ ماماندارى، جوو-لاردىڭ جۋرناليستيكا فاكۋلتەتتەرىنىڭ دەكاندارى مەن ستۋدەنتتەرى، قوعام قايراتكەرلەرى قاتىستى.
مەديا فورۋمدى «تۇركىتىلدەس جۋرناليستەر قورى» قوعامدىق قورىنىڭ پرەزيدەنتى ءنازيا جويامەرگەن قىزى اشتى.
ايتۋلى مەديا فورۋم العاش رەت 2018 جىلى ىستانبۇلدا وتكەن بولاتىن. فورۋمنىڭ ءبىرىنشى كۇنى «تۇركى ەلدەرىندەگى گەوساياسي احۋال جانە مەديا نارىق»، «تۇركى ەلدەرىندەگى تۋريزم جانە PR»، «اقپاراتتى تۇتىنۋدىڭ بولاشاعى: جاساندى ينتەللەكت، جاڭا فورماتتار»، «ايماقتىق ب ا ق جانە باسەكەلەستىك» دەگەن تاقىرىپتاردا سەسسيالار ءوتتى.
كەلەسى كۇنى ب ا ق وكىلدەرىنە ارنالعان سەمينار-ترەنينگتەر ۇيىمداستىرۋ جوسپارلانعان.