قازاق پەن تۇرىك كينوسىنىڭ ىقپالداستىعى مەن ءوزارا بايلانىسى نىعايىپ كەلەدى. تۇركيا رەسپۋبليكاسىنىڭ مادەنيەت جانە تۋريزم مينيسترلىگىنىڭ قولداۋى جانە تۇركيانىڭ الماتىداعى باس كونسۋلدىعىنىڭ كومەگىمەن «يەرلي دۇشۇنجە» قاۋىمداستىعى ۇيىمداستىرعان «9-شى تۇرىك فيلمدەرى اپتالىعى - الماتى» ءىس-شاراسى ءوتتى.
جيىنعا قازاقستان مەن تۇركيانىڭ كينوگەرلەرى، رەجيسسەرلەر، ساراپشىلار، كينو مايتالماندارى جانە كورەرمەندەر قاتىستى. كينو اپتالىعىنا قاتىسۋشىلار ءوز وي-پىكىرلەرىن ورتاعا سالدى.
تۇركيانىڭ الماتىداعى باس كونسۋلى ەۆرەن مۋددەريسوعلۋ ەكى باۋىرلاس مەملەكەت اراسىنداعى ىنتىماقتاستىقتىڭ بارلىق سالالاردا تابىستى دامىپ كەلە جاتقانىن اتاپ ءوتتى، ونىڭ ىشىندە ونەر سالاسى دا بار. بۇل فەستيۆالدىڭ ماقساتى – مادەنيەت پەن تاريحقا نازار اۋدارۋ.
«كينو سالاسىندا دەرەكتى فيلمدەر ءتۇسىرىپ كەلەمىز. تۇركياداعى كينو فەستيۆالدەرگە دە قاتىسىپ ءجۇرمىز. حالىقارالىق الاماندارعا قاتىسۋ ارقىلى اكتەرلەر مەن رەجيسسەرلەردى شىڭداي تۇسەمىز. مۇنداي ءىس-شارالار ءبىزدىڭ ەلىمىزگە تاجىريبە تۇرعىسىنان پايدالى»، – دەدى تەلەجۋرناليست ءارى دەرەكتى فيلم ءتۇسىرۋشى نۇرلان اسقار ۇلى.
«مەن «سوڭعى كەش» اتتى فيلمدە تۇرىك رەسپۋبليكاسىنىڭ العاشقى پرەزيدەنتى مۇستافا كەمال اتاتۇرىكتىڭ ءرولىن سومدايمىن. بۇل حح عاسىردىڭ باسىنداعى ماڭىزدى تاريحي كەزەڭ جايلى بيوگرافيالىق دراما. فيلمدەگى وقيعالار تۇرىك رەسپۋبليكاسى جاريالانار الدىنداعى كەزەڭدە ءوربيدى»، – دەپ ءبولىستى اكتەر ونۋر تۋنا.
ءىس-شارانىڭ قازاق-تۇرىك مادەني بايلانىستارىن نىعايتۋعا تيگىزەر ىقپالى زور ەكەنى انىق. بۇل تۋرالى الماتى قالاسى مادەنيەت باسقارماسى باسشىسى ورىنباسارىنىڭ مىندەتىن اتقارۋشى ارمان حالبەكوۆ اتاپ ءوتتى.
«ءوزىم بۇل ءىس-شاراعا ءۇشىنشى جىل قاتارىنان قاتىسىپ وتىرمىن. تۇركيانىڭ تۋريستىك الەۋەتى زور، ال تۋريستەردى تارتۋدا كينونىڭ ورنى ەرەكشە. سوندىقتان ءبىزدىڭ دە قازاق كينوسى دامي بەرسىن، سونىڭ ناتيجەسىندە بىزگە كەلەتىن ساياحاتتاۋشىلار قاتارى ارتادى دەپ سەنەمىز. باۋىرلاس ەلمەن مادەني بايلانىستاردىڭ دامۋى قۋانتادى»، – دەدى ول.
بيىل تۇرىك فيلمدەرى قالاداعى كينوتەاترلار جەلىلەرىنىڭ بىرىندە 9 قازانعا دەيىن كورسەتىلەدى، ءارى بارلىق فيلمدەر كورەرمەندەرگە تەگىن ۇسىنىلادى.