الماتىدا «جاسىل اۋلا» ناۋقانى باستالادى.
الماتى قالاسىنىڭ ەكولوگيا جانە قورشاعان ورتا باسقارماسى تۇرعىندارعا تەگىن كوشەت تاراتۋعا ارنالعان «جاسىل اۋلا» ناۋقانىنىڭ باستالعاندىعىن حابارلايدى.
كوپ قاباتتى ۇيلەر اۋلاسى مەن قوعامدىق كەڭىستىكتەردى كوگالداندىرۋعا نيەتتى ءاربىر الماتىلىق شاعان، ۇيەڭكى، شەگىرشىن، تەرەك، قاراعان مەن قايىڭنىڭ كوشەتتەرىن تەگىن الا الادى، دەپ حابارلايدى Almaty-akshamy.
ناۋقان قاتىسۋشىلارى وتىرعىزىلعان اعاشتاردى الداعى ءۇش جىل بويى كۇتىپ-باپتاۋ تۋرالى كەپىلدى مىندەتتەمەگە قول قوياتىندىعىن ەسكەرگەن ءجون. قاتىسۋ ءۇشىن zhasyl.aula22@gmail.com ەلەكتروندى پوشتاسىنا كەلەسى مالىمەتتەردى جولداۋ قاجەت:
- قاتىسۋشىنىڭ ءاتى-جونى مەن تەلەفون ءنومىرى، اعاش وتىرعىزىلاتىن ورىننىڭ ناقتى مەكەنجايى؛
- اعاش وتىرعىزىلاتىن ورىننىڭ فوتوسى (ماماندارعا ورىندى تولىقتاي باعالاۋعا مۇمكىندىك بولۋى ءۇشىن پانورامالىق فورماتتا بولعانى ءجون)؛
- سۇرالىپ وتىرعان كوشەتتىڭ ءتۇرى مەن سانى.
وتىنىمدەر 2022 جىلعى 17–25 قازان ارالىعىندا قابىلدانادى. كوشەتتەردى تاراتۋ كەلەسى مەكەنجاي بويىنشا جۇزەگە اسىرىلادى: الماتى ق.، الاتاۋ اۋدانى، ۇلجان-2 شاعىن اۋدانى، بەرتاي قىزى ك-سى، 24 («STAMP SERVICE» ج ش س بازاسى).
وتىنىمدەردى قاراۋ مەرزىمى 2022 جىلعى 17–26 قازان ارالىعىندا.
اعاش وتىرعىزۋ جۇمىستارىن 2022 جىلدىڭ 27 قازاننان باستاپ جۇرگىزىپ، فوتوەسەپ جولداۋ قاجەت.
كورسەتىلگەن ۋاقىتتان كەيىن جولدانعان وتىنىشتەر قاراستىرىلمايدى. قوسىمشا اقپارات الۋ ءۇشىن جاسىل قوردى باسقارۋ جانە مونيتورينگ بولىمىنە كەلەسى ءنومىر بويىنشا حابارلاسۋعا بولادى: +7777 068 56 38.