الماتىدا زاماناۋي ءارى ىڭعايلى اۆتوتۇراق جۇيەسىن قۇرۋ بويىنشا جۇمىس كەزەڭ-كەزەڭىمەن جۇرگىزىلىپ كەلەدى. بۇگىندە قالادا 18 مىڭنان استام تۇراق ورنى بار، ال جىل سوڭىنا قاراي ولاردىڭ سانىن 30 مىڭعا دەيىن ارتتىرۋ جوسپارلانىپ وتىر.
«اقىلى اۆتوتۇراق كولىك قوزعالىسىن باقىلاۋعا جانە جۇرگىزۋشىلەردى ەرەجە ساقتاۋعا ىنتالاندىرادى. الماتىدا كولىك سانىنىڭ كوبەيۋىنە قاراي بۇل ماڭىزدى ءىس-شارا. جوبا تۇراق ورىندارىن وڭتايلاندىرۋعا جانە قوزعالىستى جاقسارتۋعا باعىتتالعان. اقىلى تۇراقتار ەنگىزۋ كەزدەيسوق قويىلعان كولىك سانىن ازايتادى. سونداي-اق، مۇمكىندىگى شەكتەۋلى جاندار ءۇشىن ارنايى تۇراق قاراستىرىلادى»، - دەدى الماتى قالاسى «الماتى پاركينگ» مەكەمەسى ديرەكتورىنىڭ ورىنباسارى تالانت تاينوۆ.
جاقىندا المالى، اۋەزوۆ، بوستاندىق جانە مەدەۋ اۋداندارىنداعى كولىك كوپ جۇرەتىن كوشەلەردىڭ بويىندا تروتۋار ۇلگىسىندەگى جاڭا اۆتوتۇراقتار اشىلدى.
مۇندا جاقىن ماڭدا تۇراتىن جانداردىڭ جايلىلىعىنا ەرەكشە نازار اۋدارىلادى. تۇراق 08:00-دەن 19:00-گە دەيىن عانا اقىلى، ال كەشكى جانە تۇنگى ۋاقىتتا تەگىن. سونىمەن قاتار، قازىرگى ۋاقىتتا تۇرعىندار ءۇشىن اي سايىنعى ابونەمەنتتى ەنگىزۋ ماسەلەسى پىسىقتالىپ جاتىر. ياعني، جەڭىل ءتاريفتى رەزيدەنتتىك كەلىسىم قاراستىرىلۋدا.
اۆتوتۇراق اۋماعىن كەڭەيتۋ قالانىڭ ورتالىق اۋداندارىنداعى كەپتەلىستى ازايتۋ جونىندەگى كەشەندى باعدارلامانىڭ ءبىر بولىگى بولىپ تابىلادى. قاجەتتى بەلگىلەردى ورناتۋ، بەلگىلەۋ جانە اقپاراتتىق تاقتايشالاردى مونتاجداۋ بويىنشا بارلىق جۇمىس كەزەڭ-كەزەڭىمەن جۇرگىزىلەدى. اتقارىلعان جۇمىستار تۋرالى تۇرعىندارعا ب ا ق ارقىلى الدىن الا حابارلانادى.