الماتىدا قالتا ۇرلىعىمەن عانا اينالىسىپ كەلگەن 120 ادام قولعا ءتۇستى.
كريمينالدىق پوليسيا ولاردى سوڭعى ون ايدا انىقتاپ، ۇستاعان، دەپ حابارلايدى Almaty-akshamy.kz.
تەك «قۇقىقتىق ءتارتىپ» جەدەل الدىن الۋ ءىس-شاراسى بارىسىندا جەدەل ۋاكىلدەر 44 قالتا ۇرىسىن ۇستاعان. ۇرىلار اۆتوبۋستاعى جولاۋشىلاردىڭ زاتتارىن ۇپتەپ كەتىپ وتىرعان.
قاراقشىلاردىڭ اراسىندا زەينەت جاسىنداعى ادامدار دا بولعان.
«ولاردىڭ ءبىرى – قوعامدىق كولىكتە ۇرلىق جاساپ جۇرگەن 63 جاستاعى ي. ەسىمدى ازامات. قاسكوي قاربالاس ۋاقىتتا كەزەكتى ۇرلىعىن جاساۋعا شىققان. №201 باعىتتاعى قوعامدىق كولىكتە ەر ادام جولاۋشىنىڭ كۇرتەسىنىڭ قالتاسىنان Samsung تەلەفونىن ۇرلاپ كەتكەن. الايدا ونى جەدەل ۋاكىل ۇستاپ الدى. كۇدىكتى ءقازىر قاماۋدا. اۋەزوۆ اۋداندىق پوليسيا باسقارماسىندا سوتقا دەيىنگى تەرگەۋ باستالدى»، – دەپ حابارلادى الماتى قالالىق پد كريمينالدىق پوليسيا باسقارماسى.
ق ر قك-نىڭ 201-بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى.
ق ر كونستيتۋسياسىنىڭ 77-بابى 3ء-بولىمى 1-تارماعى، ق ر قك-نىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى.