الماتى اكىمى دارحان ساتىبالدى مىندەتتى الەۋمەتتىك مەديسينالىق ساقتاندىرۋ جۇيەسىمەن حالىقتى قامتۋ جونىندە كەڭەس وتكىزدى.
كەڭەس بارىسىندا الماتى قالاسىنىڭ قوعامدىق دەنساۋلىق باسقارماسى ءمامس جۇيەسىمەن حالىقتى قامتۋدىڭ قازىرگى جاعدايى، اتقارىلىپ جاتقان شارالاردىڭ ناتيجەسى، سونداي-اق، 2026 جىلى 1 قاڭتاردان باستاپ كۇشىنە ەنگەن مىندەتتى الەۋمەتتىك مەديسينالىق ساقتاندىرۋ سالاسىنداعى زاڭنامالىق وزگەرىستەر جونىندە اقپارات ۇسىندى. اتاپ ايتقاندا، جۇمىس ىستەمەيتىن، الەۋمەتتىك وسال ساناتتاعى ازاماتتار ءۇشىن جارنانىڭ جەرگىلىكتى بيۋدجەت ەسەبىنەن تولەنۋ ءتارتىبى قارالدى.
مەديسينالىق ساقتاندىرۋمەن قامتىلماعان تۇرعىندار ۇلەسىن ازايتۋ جانە تىركەلگەن حالىق رەگيسترىندەگى دەرەكتەردىڭ دۇرىستىعىن قامتاماسىز ەتۋ - جۇمىستىڭ باستى باعىتتارىنىڭ ءبىرى. وسىعان بايلانىستى قالادا دەرەكتەر بازاسىن جاڭارتۋ، سايكەسسىزدىكتەردى انىقتاۋ جانە قايتالاناتىن نە ەسكىرگەن اقپاراتتى جويۋ بويىنشا جۇيەلى جۇمىس جۇرگىزىلىپ جاتىر.
الماتىدا «قالا – اۋدان – ەمحانا» جەلىسى بويىنشا ۆەدومستۆوارالىق ءوزارا ءىس-قيمىلدىڭ ءبىرىڭعاي الگوريتمى قۇرىلعان. بۇل ءمامس جۇيەسىنە ەنبەگەن ازاماتتارعا جەدەل تۇردە قولداۋ كورسەتۋگە مۇمكىندىك بەرەدى. جۇمىس ناقتى مەكەنجاي بويىنشا جۇرگىزىلەدى: تۇرعىندارعا قوڭىراۋ شالۋ، ۇيلەردى ارالاۋ، حالىق كوپ جينالاتىن ورىنداردا اقپاراتتىق اكسيالار وتكىزۋ، سونداي-اق ازاماتتار مەديسينالىق-سانيتارلىق العاشقى كومەك ۇيىمدارىنا جۇگىنگەن كەزدە ولاردىڭ ءمامس مارتەبەسىن تۇراقتى تەكسەرۋ شارالارى قولعا الىنعان.
اسىرەسە، ۆەدومستۆوارالىق ۇيلەستىرۋ مەن حالىقپەن ءاقپاراتتىق-تۇسىندىرۋ جۇمىسىنا ەرەكشە ءمان بەرىلىپ وتىر. بۇل جۇمىس مىندەتتى الەۋمەتتىك مەديسينالىق ساقتاندىرۋ جۇيەسىنىڭ تەتىكتەرى، ساقتاندىرىلعان ازاماتتاردىڭ قۇقىعى مەن مىندەتى، جارنا تولەۋ ءتارتىبى تۋرالى حاباردارلىقتى ارتتىرۋعا باعىتتالعان.
كەڭەس قورىتىندىسى بويىنشا دارحان ساتىبالدى تۇرعىنداردى ءمامس جۇيەسىنە تارتۋ بويىنشا جۇيەلى ءارى ناقتى جۇمىس جۇرگىزۋدى، مەملەكەتتىك اقپاراتتىق بازالاردى ۋاقىتىلى جاڭارتىپ وتىرۋدى، ۇدەرىستەردى باسقارۋ ساپاسى ءۇشىن مەديسينالىق ۇيىمدار مەن سالالىق باسقارمالاردىڭ جاۋاپكەرشىلىگىن كۇشەيتۋدى تاپسىردى.
سونداي-اق، الماتى اكىمى الەۋمەتتىك وسال ساناتتاعى ازاماتتار ءۇشىن بيۋدجەت قاراجاتى ەسەبىنەن تولەنەتىن جارنالاردىڭ اشىق ءارى ءتيىمدى پايدالانىلۋىنىڭ ماڭىزىن اتادى.