بيىلعى جىلى الماتى قالاسىنىڭ ناۋرىزباي اۋدانىنداعى 8 كوپقاباتتى ءۇيدىڭ قاسبەتى جاڭارتىلادى.
ناۋرىزباي اۋدانىندا بارلىعى 579 كوپقاباتتى تۇرعىن ءۇي بار. بۇعان دەيىن «جقجك-2020» باعدارلاماسى اياسىندا بەس كوپپاتەرلى تۇرعىن ءۇيدىڭ قاسبەتتەرىنە جوندەۋ جۇمىستارى جۇرگىزىلگەن بولاتىن. الايدا، قازىرگى ۋاقىتتا 1960-1980 جىلدار ارالىعىندا سالىنعان تاعى ون ءۇيدىڭ قاسبەتتەرىن جوندەۋ قاجەت، دەپ حابارلايدى Almaty-akshamy.kz.
2024 جىلى بيۋدجەت قاراجاتى ەسەبىنەن سەگىز كوپقاباتتى ءۇيدىڭ قاسبەتتەرىنە اعىمداعى جوندەۋ جۇرگىزىلەتىن بولادى. بۇل جوبا تۇرعىن ۇيلەردىڭ سىرتقى ءتۇرىن جاقسارتۋعا جانە ولاردىڭ تۇرعىندارىنىڭ ءومىر ءسۇرۋ ساپاسىن ارتتىرۋعا باعىتتالعان.
جوندەۋگە جاتاتىن ۇيلەردىڭ مەكەنجايلارى:
قالقامان ش/ا، جانسۇگىروۆ كوشەسى، 31 جانە 33 ۇيلەر؛ اقجار ش/ا، داۋلەتكەرەي كوشەسى، 162، 166 جانە 7 ۇيلەر؛ راحات ش/ا، كوكدالا كوشەسى، 10 جانە 17 ۇيلەر، تاۋسامالى ش/ا، رىسقۇلوۆ كوشەسى، 86.
قاسبەتتەردى جوندەۋ عيماراتتاردىڭ ەستەتيكالىق كەلبەتىن جاقسارتىپ قانا قويمايدى، سونىمەن قاتار عيماراتتاردى ىلعالدان، كوگەرۋدەن جانە تۇرعىنداردىڭ دەنساۋلىعىنا تەرىس اسەر ەتۋى مۇمكىن باسقا فاكتورلاردان قورعاۋعا كومەكتەسەدى.
بۇدان باسقا، ازىرلەنگەن ديزاين-كود اياسىندا ناۋرىزباي اۋدانىنىڭ اۋماعىندا ءبىرىڭعاي ساۋلەتتىك ستيلگە كەلتىرىلگەن اقپاراتتىق قۇرىلىستار ورناتىلادى، سونداي-اق كوشە جيھازدارى مەن مۋرالداردىڭ جاڭا ەلەمەنتتەرى پايدا بولادى، بۇل اۋدانعا بىرەگەي جانە زاماناۋي كورىنىس بەرەدى.
قازىرگى ۋاقىتتا كونكۋرستىق راسىمدەر جۇرگىزىلۋدە، ال قۇرىلىس-مونتاج جۇمىستارىن 2024 جىلدىڭ 30 قاراشاسىنا دەيىن اياقتاۋ جوسپارلانۋدا. بۇل جوبا ناۋرىزباي اۋدانىنىڭ بارلىق تۇرعىندارى ءۇشىن نەعۇرلىم قولايلى جانە تارتىمدى قالالىق ورتا قۇرۋعا باعىتتالعان ماڭىزدى قادام بولىپ تابىلادى.