الماتىدا ترانسۇلتتىق قىلمىستىق توپتىڭ ارەكەتى توقتاتىلدى

سەگىز توننا سينتەتيكالىق ەسىرتكى وندىرىسىنە جول بەرىلمەدى.

ءىىم ەسىرتكى قىلمىسىنا قارسى ءىس-قيمىل دەپارتامەنتى وندىرىستىك اۋقىمدا سينتەتيكالىق ەسىرتكى شىعارۋ ءۇشىن ەلگە پرەكۋرسورلار جەتكىزۋدى جولعا قويعان قازاقستان مەن شەتەل ازاماتتارىنان قۇرالعان ترانسۇلتتىق قىلمىستىق توپتىڭ قىزمەتىن توقتاتتى، دەپ حابارلايدى Almaty-akshamy.kz Polisia.kz-كە سىلتەمە جاساپ. .

جەدەل ۋاكىلدەر زەرتحانادا سينتەتيكالىق پرەپاراتتاردى ءوندىرۋ ءۇشىن قولدانىلاتىن پرەكۋرسورلاردى جەتكىزۋ ارنالارىن انىقتاۋ بويىنشا ارنايى وپەراسيالار جۇرگىزدى. توپتىڭ ءاربىر مۇشەسىنىڭ ءرولىن جانە باسقا ادامداردىڭ قاتىسۋىن انىقتاۋ ءۇشىن “ارنايى جۇك” بۇكىل مارشرۋت بويى باقىلاۋدا بولدى. وعان اۋە ارقىلى بارلاۋ دا قولدانىلدى. وتكەن جىلدىڭ قازان ايىندا ارنايى وپەراسيانىڭ باستاپقى كەزەڭىندە، سونداي-اق اعىمداعى جىلدىڭ ناۋرىز ايىندا پرەكۋرسورلاردىڭ كونترابانداسىنا قاتىسقان ءۇش شەتەلدىك ازامات ەلدەن تىس جەرلەردە ۇستالدى.

وپەراسيانىڭ سوڭعى كەزەڭىندە 21 ناۋرىز كۇنى الماتىدا وسى ءىس بويىنشا قالعان فيگۋرانتتار – كورشىلەس ەلدەردىڭ ەكى ازاماتى جانە قازاقستاندىق قۇرىقتالدى. ولاردان ءارتۇرلى سالماقتا مەفەدرون، شەتەلدىك پوليسيا قىزمەتكەرىنىڭ جالعان كۋالىگى، زيپ-پاكەتتەر، ەلەكتروندىق تارازىلار، كالاشنيكوۆ اۆتوماتىنىڭ 7،62 مم كاليبرلى پاتروندارى تاركىلەندى. قويمالاردى ءتىنتۋ بارىسىندا ءىىم جانە الماتى قالاسى پوليسيا دەپارتامەنتىنىڭ قىزمەتكەرلەرى سينتەتيكالىق ەسىرتكىلەردى دايىنداۋ ءۇشىن قولدانىلاتىن پرەكۋرسورلاردى، سونداي-اق ەكى رەاكتوردى، ياعني سينتەتيكالىق ەسىرتكىلەردى دايىنداۋعا ارنالعان ارنايى زەرتحانالىق جابدىقتى تاركىلەدى. تاركىلەنگەن پرەكۋرسورلاردىڭ جالپى كولەمى 72،7 توننا.

وسىلايشا 8 توننا سينتەتيكالىق ەسىرتكى وندىرۋگە جول بەرىلمەدى. بۇل - 8 ميلليون ءبىر رەتتىك دوزا. كۇدىكتىلەردى ۇستاۋدىڭ الدىندا پروكۋراتۋرامەن كەلىسىلگەن ارنايى جەدەل-ىزدەستىرۋ جانە تەحنيكالىق ءىس-شارالار كەشەنى جۇرگىزىلدى. قازىرگى ۋاقىتتا تەرگەۋ ارەكەتتەرى جۇرگىزىلۋدە. ءىىم سينتەتيكالىق ەسىرتكى وندىرىلگەنگە دەيىن پرەكۋرسورلاردى جويۋ جۇمىسىن جالعاستىرۋدا.