قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ تاۋەلسىز مەملەكەتتەر دوستاستىعى سىرتقى ىستەر مينيسترلەرى كەڭەسىنىڭ كەزەكتى وتىرىسىنا قاتىستى، دەپ حابارلايدى aqshamnews.kz.
كەزدەسۋ بارىسىندا سىرتقى ساياسي ۆەدومستۆولاردىڭ باسشىلارى حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماسىپ، دوستاستىق شەڭبەرىندەگى ءوزارا ءىس-قيمىلدىڭ جاي-كۇيى مەن پەرسپەكتيۆالارىن تالقىلادى.
«بۇگىندە دوستاستىق پىكىر الماسۋدىڭ، بىرلەسكەن كۇش-جىگەردى ۇيلەستىرۋدىڭ جانە ەلدەرىمىز اراسىنداعى كەشەندى بايلانىستاردى بىرتىندەپ تەرەڭدەتۋدىڭ سۇرانىسقا يە الاڭى بولىپ وتىر. قازاقستان ۇيىمدى ودان ءارى دامىتۋعا مۇددەلى جانە ونىڭ كوپقىرلى الەۋەتىن نىعايتۋعا نيەتتى»، – دەدى قازاقستان ءسىم باسشىسى.
سونداي-اق م.نۇرتىلەۋ قاتىسۋشىلاردى تمد اياسىنداعى ىنتىماقتاستىقتىڭ ءارتۇرلى اسپەكتىلەرى بويىنشا قازاقستاننىڭ ۇستانىمدارى تۋرالى حاباردار ەتىپ، ۇيىمدى ودان ءارى دامىتۋعا باعىتتالعان ءبىرقاتار ۇسىنىستاردى ورتاعا سالدى.
ۇيىمنىڭ ينستيتۋسيونالدىق دامۋىنا، ۇيلەستىرۋ مەحانيزمدەرىن جەتىلدىرۋگە جانە دوستاستىق اياسىندا قازاقستان پرەزيدەنتى قاسىم-جومارت توقايەۆ ۇسىنعان باستامالاردى ىسكە اسىرۋعا ەرەكشە نازار اۋدارىلدى.
وسى تۇرعىدا قازاقستان باستامالارىن جۇزەگە اسىرۋدا دوستاستىق بويىنشا سەرىكتەستەردىڭ قولداۋى ەرەكشە اتالىپ ءوتتى. «ەلىمىزدىڭ ۇسىنىسى بويىنشا بۇگىنگى تاڭدا ۆولونتورلەر فورۋمى، دوستاستىق جارمەڭكەسى، تمد اكادەميالىق استاناسى جانە باسقا دا كوپتەگەن جوبالار سياقتى اۋقىمدى ءىس-شارالار بىرلەسكەن كۇش-جىگەردىڭ ارقاسىندا ىسكە اسىرىلىپ جاتىر نەمەسە جاقىن بولاشاقتا وتكىزۋگە جوسپارلانعان»، – دەپ مالىمدەدى ق ر سىرتقى ىستەر ءمينيسترى.
ۇلى وتان سوعىسىنداعى جەڭىستىڭ 80 جىلدىعى قارساڭىندا تمد ەلدەرىنىڭ ءبىرقاتار قالاسىنا، سونىڭ ىشىندە استانا، الماتى، قاراعاندى جانە باسقا دا قالالارعا «1941-1945 جج. ەڭبەك داڭقى قالاسى» قۇرمەتتى اتاعىن بەرۋ تۋرالى شەشىم كەلىسىلدى.
الماتىداعى وتىرىس ءداستۇرلى دوستىق اتموسفەرادا ءوتتى. تاراپتار دوستاستىق اياسىنداعى ىنتىماقتاستىقتى دامىتۋعا جانە وسى ۇيىمنىڭ كوپقىرلى الەۋەتىن ودان ءارى نىعايتۋعا بەيىلدىلىگىن راستادى.
سىرتقى ىستەر مينيسترلەرى كەڭەسىنىڭ كەلەسى وتىرىسى 2025 جىلعى قازان ايىندا تمد مەملەكەت باسشىلارى ءسامميتى قارساڭىندا دۋشانبە قالاسىندا وتەدى.