وپەراسيانى ساۋد ارابياسىنان كەلگەن پروفەسسور مۇحامەد ساللاح الرەشحيدان جاسادى
الماتىداعى كارديولوگيا جانە ىشكى اۋرۋلار عىلىمي-زەرتتەۋ (عزي) ينستيتۋتىنىڭ بازاسىندا تمد بويىنشا العاش رەت جۇرەك قاقپاقشاسىنىڭ جاڭا بيولوگيالىق پروتەزىن يمپلانتتاۋ وپەراسياسى جاسالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
52 جانە 60 جاستاعى ەكى ناۋقاسقا بىرەگەي وپەراسيانى ساۋد ارابياسىنان كەلگەن پروفەسسور مۇحامەد ساللاح الرەشحيدان جاسادى. وعان ەلىمىز وڭىرلەرىندەگى جەتەكشى كارديوحيرۋرگيا كلينيكالارىنىڭ كارديوحيرۋرگتارى قاتىستى.
عزي باسقارما ءتوراعاسى مارات ءپاشيموۆتىڭ ايتۋىنشا، بۇگىندە مەديسيناداعى جاڭا تەحنولوگيالار مىڭداعان ادامنىڭ دەنساۋلىعىن قالپىنا كەلتىرۋگە كومەكتەسەدى.
«بۇگىن ءبىزدىڭ كلينيكانىڭ بازاسىندا تمد اۋماعىندا العاش رەت ساۋد ارابياسىنىڭ جەتەكشى كارديوحيرۋرگىنىڭ قاتىسۋىمەن جۇرەكتىڭ قولقا قاقپاقشاسىن اۋىستىرۋ ءۇشىن سوڭعى بۋىنداعى بيولوگيالىق پروتەز يمپلانتاسيالاندى. بۇل بيولوگيالىق جۇرەك قاقپاقشاسىنىڭ پروتەزى كلاپان يننوۆاسياسىنىڭ 40 جىلدان استام تاجىريبەسىنە نەگىزدەلگەن. تاجىريبەدەگى ەڭ ۇزدىگى جيناقتالىپ، بۇكىل الەمدىك تاجىريبەنى بىرىكتىرە وتىرىپ، جاڭا بۋىن كلاپانى قۇرىلدى، ول جوعارى گەموديناميكالىق كورسەتكىشتەرىمەن، پايدالانۋ جەڭىلدىگىمەن جانە بەرىكتىگىمەن، ءۆارفاريندى قولدانۋدىڭ قاجەتتىلىگىنىڭ بولماۋىمەن ەرەكشەلەنەدى»، - دەيدى مارات پاشيموۆ.
دارىگەردىڭ سوزىنشە، ميترالدى قاقپاقشا اقاۋلارى بار ەكى ناۋقاس جۇرەك ايماعىنداعى اۋىرسىنۋ، فيزيكالىق جۇكتەمە كەزىندە ەنتىگۋ، تەز شارشاۋ جانە تاعى باسقا شاعىمدارمەن ستاسيونارعا تۇسكەن. ولارعا حيرۋرگيالىق ارالاسۋ ۇسىنىلدى.
«جۇرەك قاقپاقشالارىن پروتەزدەۋ تەحنولوگيالارى ۇزدىكسىز دامىپ كەلەدى. جۇرەك قاقپاقشالارىن پروتەزدەۋ وپەراسياسى جۇرەككە قان اعىمىن قالىپقا كەلتىرۋ جانە جۇرەك جەتكىلىكسىزدىگىنىڭ دامۋىنا جول بەرمەي، جۇرەككە قوسىمشا جۇكتەمەنى جويۋ ءۇشىن جۇرگىزىلەدى. اسقىنۋ ءقاۋپى جوعارى ناۋقاستاردا، سونداي-اق ەگدە جاستاعى ادامداردا جۇرەك قاقپاقشالارىنىڭ بيولوگيالىق پروتەزىن قولدانعان ءجون. بيولوگيالىق قاقپاقشالاردىڭ ماڭىزدى ارتىقشىلىعى – قاندى سۇيىلتاتىن دارىلەردى – انتيكواگۋليانتتاردى ءومىر بويى قابىلداۋدىڭ قاجەتى بولمايدى»، - دەپ اتاپ ءوتتى كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتايەۆ.
دارىگەرلەردىڭ ايتۋىنشا، جاڭا بۋىن جۇرەك قاقپاقشاسىنىڭ بيولوگيالىق پروتەزى وڭاي جانە ۇزاق قىزمەت ەتەدى. بۇل قاقپاقشانىڭ قىزمەت ەتۋ مەرزىمى ستاندارتتى كلاپاندارعا قاراعاندا ۇزاعىراق.
«قاقپاقشا يمپلانتاسياسى ءۇشىن ستاندارتتى ءتاسىل دە، ستەرنوتوميانى قاجەت ەتپەيتىن از ءينۆازيۆتى تەحنيكا دا قولايلى، بۇل كەۋدە قۋىسىنىڭ قاڭقاسىن ساقتاۋعا، ينفەكسيالىق اسقىنۋلاردىڭ ءقاۋپىن ازايتىپ، اۋىرسىنۋ سيندرومىن تومەندەتۋگە كومەكتەسەدى. سونداي-اق، وپەراسيادان كەيىنگى كەزەڭدە تىنىس الۋدى جەڭىلدەتەدى، ۇزاق ۋاقىت بويى كورسەت كيۋ قاجەتتىلىگىن جويادى جانە قالىپتى ومىرگە تەزىرەك ورالۋعا مۇمكىندىك بەرەدى»، - دەپ ءتۇسىندىردى كارديوحيرۋرگتار.