قابىلدانعان بيۋدجەتتە قالانىڭ سەيسميكالىق قاۋىپسىزدىگىن قامتاماسىز ەتۋگە باعىتتالعان شارالارعا قاراجات بولىنگەن.
الماتى قالاسىنىڭ 2025-2027 جىلدارعا ارنالعان بيۋدجەتى ءماسليحاتتىڭ كەزەكتەن تىس سەسسياسىندا بەكىتىلدى، دەپ حابارلايدى aqshamnews.kz
عيماراتتار مەن قۇرىلىستاردىڭ سەيسميكالىق قاۋىپسىزدىگىن ارتتىرۋ ۇزاق مەرزىمدى جانە اۋقىمدى قارجىنى قاجەت ەتەتىن ۇدەرىس بولعاندىقتان، بۇل ماقساتقا شامامەن 14 ملرد تەڭگە قاراستىرۋ جوسپارلانىپ وتىر.
حالىقارالىق تاجىريبەگە سايكەس، قالادا نىسانداردىڭ ناقتى سەيسموتۇراقتىلىعىن انىقتاۋ ءۇشىن ءتولقۇجاتتاۋ جۇرگىزىلۋدە. وسى جۇمىستىڭ ناتيجەسىندە 2025 جىلى جاپونيا، اقش جانە يزرايل ۇلگىسىندە عيماراتتاردى سەيسميكالىق كۇشەيتۋگە ارنالعان قالالىق باعدارلاما ازىرلەنىپ، ەنگىزىلەدى.
الماتىدا الەۋمەتتىك جانە اكىمشىلىك مەملەكەتتىك عيماراتتاردى سەيسميكالىق كۇشەيتۋ جۇمىستارى جىل سايىن جۇرگىزىلەدى. 2025 جىلى بوستاندىق جانە مەدەۋ اۋداندارىنداعى 3 مەكتەپتى سەيسميكالىق كۇشەيتۋ اياقتالادى، سونداي-اق، تۇركسىب اۋدانىنداعى №50 مەكتەپ-ليسەيدە سەيسميكالىق نىعايتۋ جۇمىستارى باستالادى. اۋەزوۆ، بوستاندىق جانە مەدەۋ اۋداندارىنداعى 7 بالاباقشادا جۇمىستار قولعا الىنادى.
سونىمەن قاتار، كوشكىن ءقاۋپىن باعالاۋ جانە كوشكىن ءقاۋپى بار ۋچاسكەلەردىڭ (كىشى جانە ۇلكەن الماتى، قارعالى، اقساي وزەندەرىنىڭ باسسەينى) ءتولقۇجاتىن جاساۋ ءۇشىن 168،8 ملن تەڭگە سوماسىنا 3 جىلدىق جوبا جۇزەگە اسىرىلۋدا.
ۇلتتىق سەيسمولوگيالىق باقىلاۋ جانە زەرتتەۋ ورتالىعىنىڭ مالىمەتىنشە، الماتى اگلومەراسياسىن تولىق قامتۋ جانە سەيسمولوگيالىق دەرەكتەردى وڭدەۋ جىلدامدىعىن ارتتىرۋ ءۇشىن قازىرگى 51 سەيسموستانسياعا قوسىمشا 70 ستانسيا ورناتۋ قاجەت. بۇل 2025-2026 جىلدارى جۇزەگە اسىرىلىپ، جەر سىلكىنىسىنىڭ ەرتە ەسكەرتۋ جۇيەسىن جەتىلدىرۋگە مۇمكىندىك بەرەدى.
قالا اۋماعى ءبىرىڭعاي باعدارلامالىق قامتاماسىز ەتۋ ارقىلى جۇمىس ىستەيتىن سەيسموداچيكتەرمەن قامتىلادى. بۇعان قوسا، الماتى ينفراقۇرىلىمىن جۇڭگو، قىرعىزستان جانە وزبەكستان سياقتى كورشىلەس مەملەكەتتەردىڭ جۇيەلەرىمەن ينتەگراسيالاۋعا دايىندىق جۇمىستارى جۇرگىزىلەدى.
قالانىڭ قاۋىپسىزدىگىن ارتتىرۋ ماقساتىندا سيمۋلياسيالىق وقۋ-ادىستەمەلىك ورتالىقتىڭ قۇرىلىسى دا جوسپارلانعان. بۇل جوبا تۇرعىنداردى توتەنشە جاعدايدا ءوزىن-وزى قۇتقارۋ جانە العاشقى مەديسينالىق كومەك كورسەتۋ داعدىلارىنا ۇيرەتۋگە جول اشادى. ورتالىق نۇسقاۋشىلارى ازاماتتارعا قاۋىپ-قاتەر كەزىندە ءوزىن-وزى قورعاۋ جانە العاشقى كومەك كورسەتۋ ادىستەرىن ۇيرەتەدى.