كومەديا مەن ەكشن قاتار جۇرەتىن رومانتيكالىق دراما بالالار ۇيىنەن شىققان قوس عاشىقتىڭ اۋىر تاعدىرىنان سىر شەرتەدى.
جاڭا كارتيناداعى باستى رولدەردى ەلىمىزگە تانىمال اكتەرلەر وينايدى. جاڭا كينونىڭ العاشقى تۇسىرىلىمىندە رەجيسسەر ءالونا الماز ءداستۇرلى تۇردە تارەلكە سىندىردى، دەپ حابارلايدى Almaty-akshamy.kz 24.kz-كە سىلتەمە جاساپ.
«ۇرلىقشىلار» دەپ اتالاتىن كارتينادا قوس جەتىمنىڭ ۇلكەن قالاداعى ءومىر قيىندىقتارى، شىتىرمان وقيعالارى سۋرەتتەلەدى. Tiger Films پروديۋسەرلىك كومپانياسىنىڭ ۇجىمى نيۋ-يورك كينواكادەمياسىنىڭ تۇلەگى ءالونا المازدىڭ وتاندىق كينوعا قوسار ۇلەسى مول ەكەنىنە سەنىمدى.
«مەن وتاندىق كينوعا باتىستىڭ ءتۇىسىرىلىم تەحنولوگياسىن الىپ كەلگىم كەلەدى. وسىلايشا كورەرمەندەردىڭ وتاندىق كينوعا دەگەن قىزىعۋشىلىعىن ارتتىرۋدى كوزدەيمىن. ءقازىر باتىس فيلمدەرىنە دەگەن سۇرانىس جوعارى. تىم بولماسا تارازىنىڭ ەكى باسىن تەڭەستىرۋ دە ناتيجە. ويتكەنى، ءقازىر جاقسى وتاندىق فيلمدەر ءتۇسىرىلىپ جاتىر»، - دەيدى رەجيسسەر الەنا الماز.
فيلم بالالار ۇيىندە تاربيەلەنگەن ءامىر مەن سانا ەسىمدى كەيىپكەرلەردىڭ ومىرىنە قۇرىلعان. ولار اشتىقپەن كۇرەسۋ ءۇشىن ۇرلىق جاساپ وسەدى. مەكتەپ بىتىرگەن سوڭ ءامىر مەن سانا باعالى زاتتاردى جىمقىرۋعا بەت بۇرادى. بايلاردان ۇرلاپ العانىن مۇقتاجدارعا تاراتىپ بەرەدى. جەتىمدەر ومىرىندەگى شىتىرمان وقيعا وسىلاي باستالادى.
«اۋىر، ءبىراق وتە قىزىقتى رول. شىنىمدى ايتسام، مەنىڭ كەيىپكەرىم «ەڭ سۇيىكتى» كەيىپكەرىم دەپ ايتا الامىن. وسىعان دەيىن تۇسكەن كەيىپكەرلەرىمنىڭ اراسىندا. سول ءۇشىن مەن تىرىسىپ جاتىرمىن. رەجيسسەردىڭ كومەگىمەن، كوماندانىڭ كومەگىمەن. ءبىز دايىندالدىق. كادىمگىدەي ءبىر جارتى ايداي دايىندالدىق»، - دەيدى اكتريسا ايگەرىم ءجۇنىسوۆا.
فيلمدەگى ەكسترەمالدى قيمىلداردى اكتەرلەردىڭ وزدەرى ورىندايدى. جاڭا كارتينا Kinopark & Kinoplexx كينوتەاترلارىنان 18 قاڭتاردان باستاپ كورسەتىلەدى.