الماتى قالاسىنىڭ تۇركسىب اۋدانىندا انتيتەررورلىق وپەراسيا رەجيمى ەنگىزىلدى. بۇل تۋرالى تەرروريزمگە قارسى كۇرەس جونىندەگى قالالىق جەدەل شتابتان ءمالىم ەتتى، دەپ حابارلايدى almaty-akshamy.kz
«تەرروريزمگە قارسى كۇرەس جونىندەگى قالالىق جەدەل شتاب اعىمداعى جىلدىڭ 26 قاڭتارىندا ساعات 00.00-دەن 27 قاڭتار ساعات 00.00-گە دەيىن الماتى قالاسى تۇركسىب اۋدانى اۋماعىندا انتيتەررورلىق وپەراسيا رەجيمى ەنگىزىلگەنىن حابارلايدى»، - دەلىنگەن مالىمەتتە.
ەسكە سالساق، بيىلعى 4-6 قاڭتار ارالىعىندا تەرروريزمگە قارسى وپەراسيالار بارىسىندا الماتىداعى مەملەكەتتىك مەكەمەلەر مەن كوممەرسيالىق نىساندارعا قاراقشىلىق شابۋىل جاساعان ۇيىمداسقان قىلمىستىق توپتىڭ 5 باسشىسى مەن مۇشەلەرى ۇستالعان ەدى.
تۇتقىنداۋ كەزىندە كۇدىكتىلەردەن قارۋ-جاراق («پم»، «تت» ماركالى تاپانشالار، كەسىلگەن شولاق مىلتىق، ولارعا ارنالعان پاتروندار)، ۇنتاق ءتارىزدى زات جانە ەرەكشە ءيىسى بار تابلەتكالار تابىلدى.
«ارنايى جانە قۇقىق قورعاۋ ورگاندارى جاپپاي تارتىپسىزدىكتەرگە قاتىسۋشىلار مەن ۇيىمداستىرۋشىلاردى انىقتاۋ بويىنشا جەدەل-ىزدەستىرۋ وپەراسيالارىن جالعاستىرۋدا. قۇقىق قورعاۋ ورگاندارىنىڭ جۇمىسىنا تۇسىنىستىكپەن قاراۋدى، ولاردىڭ زاڭدى تالاپتارىن قاتاڭ ساقتاۋدى سۇرايمىز»، - دەپ اتاپ ءوتتى تەرروريزمگە قارسى كۇرەس جونىندەگى الماتى قالالىق جەدەل شتابىندا.