الماتىنىڭ ءتورت كوللەدجى جاڭاشا تەحنيكالىق جانە كاسىبي ءبىلىم بەرەتىن قۇزىرەتتىلىك ورتالىقتىڭ جۇمىسىن تانىستىردى. مۇندا ءقازىر سيفرلىق تەحنولوگيالاردى، دۋالدى وقىتۋ جۇيەسى سياقتى باعدارلامالاردى ەنگىزىپ، ەكونوميكانىڭ ناقتى سەكتورىمەن ىنتىماقتاسا وتىرىپ دامىپ كەلەدى. قازاقستان پرەزيدەنتىنىڭ مۇرىندىق بولۋىمەن قولعا الىنعان جۇمىسشى ماماندىقتار جىلىنىڭ اياسىندا، قالا اكىمدىگى مەن ءبىلىم باسقارماسىنىڭ قولداۋىمەن كوللەدجدەر قازىرگى كەزدە سۇرانىسقا يە بولىپ تۇرعان كاسىبي مامانداردى قالاي دايارلاپ جاتقانىن كورسەتتى. پرەسس-تۋردى وڭىرلىك كوممۋنيكاسيالار قىزمەتى مەن ءبىلىم باسقارماسى بىرلەسىپ ۇيىمداستىرعان.
قۇزىرەتتىلىك ورتالىقتارى ءبىلىم بەرۋ مەن ەڭبەك نارىعى اراسىنداعى بايلانىستىرۋشى بۋىنعا اينالىپ، تەوريا مەن تاجىريبە اراسىنداعى الشاقتىقتى جويۋعا كومەكتەسپەك. بۇل جەردە ستۋدەنتتەر تەوريالىق ءبىلىم الىپ قانا قويماي، ونى جۇمىسپەن ۇشتاستىرىپ، داعدىلانىپ شىعادى.
الماتىنىڭ ءتورت جەتەكشى كوللەدجىنىڭ باسشىلىعى ءبىلىم بەرۋ ادىستەرىندەگى بىرەگەي ءتاسىل مەن جەتىستىكتەرىن كورسەتتى. مىسالى، الماتى كوپسالالى كوللەدجىنىڭ، الماتى ەنەرگەتيكا جانە ەلەكتروندىق تەحنولوگيالار كوللەدجىنىڭ جانە الماتى قۇرىلىس-تەحنيكالىق كوللەدجىنىڭ بازاسىندا WorldSkills چەمپيوناتىنا دايىندىق بويىنشا جاتتىقتىرۋ لاگەرلەرى جۇمىس ىستەيدى. مۇندا ەلەكترومونتاج، وندىرىستىك اۆتوماتيكا، اۆتوكولىكتى تەحنيكالىق قىزمەت كورسەتۋ، IT، سانتەحنيكا جانە جىلىتۋ، قۇرعاق قۇرىلىس، دانەكەرلەۋ مەن جيھاز ءوندىرىسىن وقىتادى. بارلىعى وسى زامانعى جابدىقتاردى پايدالانىپ، تاجىريبەلى تالىمگەرلەردىڭ باسشىلىعىمەن وتەدى.
«كوللەدجدى بىتىرگەن سوڭ ستۋدەنتتەردىڭ 87%-دان استامى جۇمىسقا ورنالاسادى، قالعانى جوعارى وقۋ ورىندارىندا بىلىمدەرىن جالعاستىرادى، اسكەرگە كەتەدى نەمەسە باسقا جولدى تاڭدايدى. دۋالدى وقىتۋ اياسىندا بىزدە ستۋدەنتتەردىڭ 100% جۇمىسقا ورنالاسقان. ءبىز ستۋدەنتتەردى كاسىپورىنداردىڭ سۇرانىسى بويىنشا وقىتامىز. مىسالى، جيھاز ءوندىرىسى باعىتىندا ستۋدەنتتەر ءبىرىنشى كۋرستان باستاپ ءوندىرىس ورنىنا بەكىتىلىپ، تاجىريبە وتەدى، وقۋدى بىتىرگەننەن كەيىن سول جەرگە جۇمىسقا ورنالاسادى»، – دەيدى الماتى كوپسالالى كوللەدجىنىڭ ديرەكتورى اسىلحان بەيسەتبايەۆ.
ونىڭ ايتۋىنشا، كوللەدجدىڭ وقۋ شەبەرحانالارى جاي عانا سىنىپتار ەمەس، تولىققاندى جاتتىقتىرۋ الاڭى.
«ءبىز تەحنيكالىق تەرمينولوگيانى اعىلشىن تىلىندە ۇيرەنۋگە ۇلكەن ءمان بەرەمىز، سەبەبى WorldSkills پەن EuroSkillsء-تىڭ بارلىق جارىسى وسى تىلدە وتەدى. ستۋدەنتتەرگە تەحنيكالىق اۋدارمالاردى قامتيتىن ارنايى كۋرستار ۇيىمداستىرىلادى»، – دەپ قوستى وندىرىستىك وقىتۋ شەبەرى، اۆتوكولىككە تەحنيكالىق قىزمەت كورسەتۋ باعىتى بويىنشا حالىقارالىق ساراپشى تاڭشولپان تولەندييەۆا.
الماتى قۇرىلىس-تەحنيكالىق كوللەدجىنىڭ ءبولىم مەڭگەرۋشىسى باۋىرجان مۇحامەدجانوۆ ستۋدەنتتەردى حالىقارالىق دەڭگەيدە قالاي دايارلاپ جاتقاندارىن ايتىپ بەردى.
«پولشا مەن فرانسيادا وتكەن جارىسقا بارىپ قايتتىق جاقىندا. وندا ءبىزدىڭ ستۋدەنت جۇلدەلى ورىن الىپ، «ۇزدىك مامان» مەدالونىن يەلەندى. بۇل ەلىمىزدە بۇرىن-سوڭدى بولماعان ۇلكەن جەتىستىك. بۇل ءبىزدىڭ ماماندار حالىقارالىق دەڭگەيگە ساي ەكەنىن كورسەتتى»، – دەدى باۋىرجان مۇحامەدجانوۆ.
الماتى ەنەرگەتيكا جانە ەلەكتروندىق تەحنولوگيالار كوللەدجىنىڭ جانىندا ەلەكتر ەنەرگەتيكاسى مەن ءوندىرىستى اۆتوماتتاندىرۋ سالاسىنداعى ايماقتىق قۇزىرەتتىلىك ورتالىعى جۇمىس ىستەيدى. مۇندا قورىتىندى اتتەستاسيانىڭ ەمتيحانىن وتكىزۋگە، WS چەمپيوناتتارىنا قاتىساتىنداردى دايارلاپ، پراكتيكالىق وقىتۋعا ارنالعان جاتتىعۋ پوليگونى جۇمىس ىستەيدى.
كوللەدج ديرەكتورى باعداۋلەت ابىزبايەۆ حالىقارالىق جارىستارداعى ستۋدەنتتەردىڭ دايىندىعى وتە جوعارى بولعانىن اتاپ ءوتتى.
«ءبىز «Smartlife» كومپانياسىمەن ارىپتەستىك ورناتىپ، «اقىلدى ءۇي» باعىتى بويىنشا وقىتامىز. ورتالىقتا كۇن پانەلىن وندىرەتىن شەبەرحانا دا بار. ستۋدەنتتەر ءوز قولىمەن كۇن پانەلدەرىن جاساپ، بۇكىل جۇمىستى مەڭگەرىپ، بولاشاقتا كوللەدج عيماراتىن ەلەكتر ەنەرگياسىمەن قامتاماسىز ەتەدى. اكىمدىك پەن دۋالدى وقىتۋ جۇيەسىنىڭ قولداۋىنىڭ ارقاسىندا تۇلەكتەرىمىزدىڭ 95%-ى جۇمىسقا ورنالاسقان»، – دەپ اتاپ ءوتتى ول.
سونداي-اق مۇندا بىلىكتىلىكتى ارتتىرۋ ارقىلى قىسقا مەرزىمدى كۋرستار جۇرگىزىلەدى. وسى ۋاقىتقا دەيىن «ەلەكترومونتەر» مەن «ەلەكترومونتاجشى» ماماندىقتارى بويىنشا 500-دەن استام مامان دايارلاندى.
الماتى تەحنولوگيالىق كوللەدجىنىڭ عىلىمي جۇمىس جونىندەگى ورىنباسارى ايجان تەمىربەكوۆانىڭ ايتۋىنشا، «تاماق تەحنولوگيالارى» باعىتى بويىنشا قۇزىرەتتىلىك ورتالىعى 2022 جىلى «جاس مامان» جوباسى اياسىندا الماتى قالاسى ءبىلىم باسقارماسىنىڭ قولداۋىمەن اشىلىپتى.
«ورتالىق وسى زامانعى سيفرلىق جابدىقتارمەن تولىق جابدىقتالعان، مۇنداي قۇرال-جابدىق قالاداعى كەيبىر مەيرامحانالاردا دا جوق. بۇل ستۋدەنتتەرگە ەڭ وزىق تەحنولوگيالار مەن داعدىلاردى مەڭگەرۋگە مۇمكىندىك بەرەدى. ءبىز ەمتيحاندارعا دايىنداپ، مامانداردى قايتا دايارلاپ، سونداي-اق قىسقا مەرزىمدى كۋرستار ۇيىمداستىرامىز»، – دەيدى ايجان بولات قىزى.
ونىڭ ايتۋىنشا، ورتالىقتا ەرتە كاسىبي باعدارلاۋ باعىتىندا دا جۇمىس جۇرگىزىلەدى.
«2024 جىلدان باستاپ ءبىز «بولاشاق ماماندىقپەن جاز» جوباسىن باستاپ، وعان 50 مەكتەپ وقۋشىسى قاتىستى. ورتالىقتا جىل سايىن 7 جاستان باستاپ بالالارعا ارنالعان «فۋد-باتتل» بايقاۋى مەن مەكتەپ وقۋشىلارىنا ارنالعان كاسىبي سىنامالار وتكىزىلەدى، ولار بىزگە اپتا سايىن كەلىپ تۇرادى. №153 ا.روزىباكييەۆ اتىنداعى مەكتەپ-گيمنازيامەن بىرلەسىپ «ءبىر مەكتەپ – ءبىر داعدى» جوباسى دا جۇزەگە اسىرىلىپ جاتىر»، – دەدى ايجان تەمىربەكوۆا.
اتالعان ءتورت كوللەدجدىڭ بارلىق قۇزىرەتتىلىك ورتالىقتارى زاماندىق قۇرالدارمەن تولىق جابدىقتالعان. قوناقتارعا وقۋ پروسەسى، شەبەرلىك ساباقتارى، ستۋدەنتتەردىڭ قولىنان شىققان ونىمدەردىڭ كورمەسى مەن WorldSkills ەلەمەنتتەرىمەن كاسىبي كورسەتىلىمدەر ۇسىنىلدى.
حالىقارالىق ساراپشىلار قازاقستاندىق ستۋدەنتتەردىڭ دايارلىق دەڭگەيى حالىقارالىق ستاندارتتارعا ساي ەكەنىن اتاپ ءوتتى.
الماتىلىق ستۋدەنتتەردىڭ دايارلىق دەڭگەيىن كورسەتۋ ءۇشىن ايتا كەتەيىك: 2024 جىلدىڭ قىركۇيەگىندە فرانسيانىڭ ليون قالاسىندا وتكەن 47ء-شى WorldSkills International حالىقارالىق چەمپيوناتىندا قازاقستان ۇلتتىق قۇراماسى العاش رەت ۇلكەن جەتىستىككە قول جەتكىزىپ، 7 مەدالون الدى. الماتى قالاسى اتىنان ۇلتتىق قۇراما ساپىندا 4 ادام مەن «قۇرعاق قۇرىلىس جانە سىلاق جۇمىستارى» قۇزىرەتتىلىگى بويىنشا ءبىر حالىقارالىق ساراپشى – الماتى قۇرىلىس-تەحنيكالىق كوللەدجىنىڭ وندىرىستىك وقىتۋ شەبەرى باۋىرجان مۇحامبەتجانوۆ قاتىستى. تۋرنير قورىتىندىسى بويىنشا استك ستۋدەنتى ميحايل پوپوۆ («قۇرعاق قۇرىلىس جانە سىلاق جۇمىستارى») پەن «ادىلەت» كوللەدجىنىڭ ستۋدەنتى جانەل ساعىندىق («قوناق ءۇي قابىلداۋشىسى») «ۇزدىك» اتاعىن الدى. بۇل – حالىقارالىق ساراپشىلاردىڭ مويىنداعانى، الماتىلىق ستۋدەنتتەردىڭ كاسىبي شەبەرلىگىنىڭ دەڭگەيى جوعارى ەكەنىنە دالەل.
ءقازىر الماتى كوللەدجدەرىنىڭ ستۋدەنتتەرى مەن شەبەرلەرى 2025 جىلعى 9-13 قىركۇيەك ارالىعىندا دانيانىڭ حەرنينگ قالاسىندا وتەتىن EuroSkills Herning 2025 حالىقارالىق چەمپيوناتىنا دايىندالىپ جاتىر. الماتىنىڭ اتىنان ءۇش ستۋدەنت قاتىسپاق: الماتى قۇرىلىس-تەحنيكالىق كوللەدجى («قۇرعاق قۇرىلىس جانە سىلاق جۇمىستارى»)، «ادىلەت» كوللەدجى» («قوناق ءۇي قابىلداۋشىسى») مەن الماتى اۆتوموبيل جانە ءسان يندۋسترياسى كوللەدجى («ءسان تەحنولوگياسى»).
قۇزىرەتتىلىك ورتالىقتارى – جاي عانا وقۋ سىنىپتارى ەمەس، بۇل – سيفرلىق جانە يندۋستريالىق ەكونوميكا ءۇشىن مامانداردى دايارلايتىن قۋاتتى ءبىلىم بەرۋ حابتارىنا اينالىپ بارادى. ولار تەحنيكالىق ءبىلىمدى بەدەلدى ەتىپ، جاستارعا جارقىن بولاشاق سىيلاپ، ادام كاپيتالىن دامىتۋعا اتسالىساتىن ۇلكەن ءبىلىم ورداسى بولىپ وتىر.