قازاقستاندىق كينەماتوگرافتىڭ مەترى قۇرمەتىنە تاعايىندالعان ماراپات بەس نوميناسيا بويىنشا بەرىلدى
الماتىدا قازاقستاننىڭ حالىق ءارتىسى، تەاتر جانە كينو اكتەرى ءاسانالى ءاشىموۆتىڭ 85 جىلدىعىنا ارنالعان «اڭىز ءاسانالى» اتتى سالتاناتتى كەش ءوتتى، دەپ حابارلايدى Almaty-akshamy.kz.
پارلامەنت سەناتىنىڭ ءتوراعاسى ماۋلەن اشىمبايەۆ، الماتى قالاسىنىڭ اكىمى ەربولات دوسايەۆ، مادەنيەت جانە سپورت ءمينيسترى داۋرەن ابايەۆ قۇتتىقتاۋ سوزدەرىن ايتتى. سالتاناتتى شاراعا مادەنيەت قايراتكەرلەرى، اقىندار، جازۋشىلار جانە ت. ب. قاتىستى.
كەشتىڭ باستى وقيعاسى «ءاسانالى» سىيلىعىمەن ماراپاتتاۋ بولدى. قازاقستاندىق كينەماتوگرافتىڭ مەترى قۇرمەتىنە تاعايىندالعان ماراپات بەس نوميناسيا بويىنشا بەرىلدى. ازامات ساتىبالدى ۇزدىك كينواكتەر اتاندى، تەاتردىڭ ۇزدىك اكتەرى – زارينا كارمەن، ۇزدىك كينورەجيسسەر – ءادىلحان ەرجانوۆ، ۇزدىك تەاتر رەجيسسەرى – گاۋحار اداي جانە «تەاتر جانە كينو ونەرىنە قوسقان ۇلەسى ءۇشىن» سىيلىعىن ليديا كادەنوۆا الدى. جەڭىمپازدارعا 1 ملن تەڭگە كولەمىندە اقشالاي سىياقى بەرىلدى.
